Мергьяматлувилин “Духтурриз баркалла” серенжемдин тешкилатчийри США-дай, Австриядай, Израилдай, Белоруссиядай ва маса уьлквейрай тир медработникрилай ана иштиракун патал арзаяр кьабулнава. Идан гьакъиндай илимдинни сагъламвилин “Дурнаяр”  комплексдин (НОК) регьбер, МГУ-дин профессор Мегьамед Мегьамедова  хабар гана.

“Духтурриз баркалла” проектдин макьсад Каспий гьуьлуьн къерехда авай сагъламвилин центрада COVID-19  тIугъвалдик азарлу хьайибуруз куьмек гудайла, чеб азарлу хьайи медицинадин работникар гьакъисуз сагъар хъувун я. “Чаз Нью — Джерсидай,  Лос-Андже­лесдай, Чикагодай, Донецкдай, Белоруссия­дай, Израилдай ва Австриядай коронавирусдихъ галаз женг чIугур чи ватанэгьли духтур­ри чебни “Духтурриз баркалла”  программадик кутун тIалабзавай зенгер ийизва. Чи адетдин серенжем икI гегьеншдиз чукIунал чун шад я, гьелбетда, чна жезмай кьван и кардихъ игьтияж авай вирибуруз куьмек гуда”, — лагьана Мегьамед Мегьамедова.

6-июлдилай Дагъустандин медработ­никар “Дурнаяр” НОК-да гьакъисуз сагъар хъийиз­ва. Духтурри, медсестрайри, санитарри ва тади куьмекдин машинрин шоферри Каспий гьуьлуьн къерехда ял яда.

Гатун эхирдалди “Дурнаяр” НОК-да СКФО-дай, Москвадай, Санкт-Петербургдай ва РФ-дин маса регионрай тир санлай 500-далай гзаф медработникри ял яда. Серенжем Дагъустандин Кьил Владимир Васильева тереф хуьналди кьиле тухузва.

«Лезги газет»