Каспийск шегьерда РусГидродин куьмекдалди аялриз сирнавиз чирдай пулсуз тарсар кьиле тухузва. “РусГидро” ПАО-дин Дагъустандин филиалди ва Дагъустан Республикадин сирнавунин федерацияди гьар йисуз гъиле кьазвай мергьяматлувилин “Ачух яд” проектдин нубатдин сезон башламишнава.
Адан асул макьсад аялриз неинки сирнавиз, гьакIни гьуьле ва я вирера, вацIара арадал атун мумкин тир жуьреба-жуьре маса четин гьаларай экъечIиз чирун я.
Пешекар тренеррин гъилик кваз ва къутармишдайбурун куьмекдалди тешкилнавай вердишвилер гун Каспийск шегьердин гьуьлуьн къерехда авай аялрин пляждал гьар йикъан нисинилай кьулухъ, сятдин 4-далай 6-далди, кьиле физва. Сифте аялар гъавурда твазва, ахпа беден гьазурзава (разминка), гуьгъуьнлай, гьеле гьуьлуьн къерехдал аламаз, абуру сирнавунин асул элементар чирзава, анжах идалай кьулухъ абуру чпин чирвилер цин къене ахтармишзава.
“Ачух яд” серенжем тухуз им пуд лагьай сефер я. Алатай кьве йисан вахтунда проектда 300-далай гзаф аялри иштиракна, хабар гузва РусГидродин информациядин къуллугъди.
«Лезги газет»
