Дагъустан Республикадин Гьукуматдин Председатель Артем Здунов 21-июлдиз “Игитрин лигадин” векилрихъ галаз гуьруьшмиш хьана. Лап чIехи гьевескаррин спортдин мярекатар кьиле тухунин рекьяй и компания неинки чи уьлкведа, гьакIни вири дуьньяда сифтегьан жергейра ава.
Республикадин премьер-министрди манийвилер аваз чамарар авунай Россиядин Федерациядин вице-президент Диляра Садыковадихъ ва Дагъустандин Федерациядин регьбер Гьамид Мегьамедовахъ галаз Дагъустанда “Игитрин лигадин” проектар уьмуьрдиз кечирмишунин, гьакIни регионда спортдин цIийи жуьре вилик тухунин мумкинвилер веревирдна.
Манийвилер галай чамарар спортдин цIийи жуьре я, ам Россияда 2013-йисалай вилик физва. И йисалай “Игитрин лигадин” тешкилатди уьлкведа жуьреба-жуьре серенжемар — “Игитрин чамарар”, “Игитрин къугъунар”, “Игитрин арена” ва масабур тухузва. Тешкилатдин регьбер Ксения Шойгу я. Гьа са вахтунда спортдин мярекатар вири Россияда — Калининграддилай Петропавловскдал кьван кьиле тухузва. Идалайни гъейри, чамарар Азербайжанда ва Германиядани тешкилна. Санлай къачурла, компания тешкилай вахтундилай инихъ кьиле тухвай 350 мярекатда са миллиондилай гзаф инсанри иштиракна. 2019-йисан октябрдиз манийвилер авай чамарри спортдин официальный жуьредин дережа къачуна.
“Чун спортдин и жуьре вилик тухунал активнидаказ машгъул жезва. И жуьре Вирироссияда жегьилрин арада гегьеншдиз чкIанва. Чамарар тамашуниз лайихлубур жезва. ГьикI лагьайтIа, чна акъажунар йисан кьиляй-кьилиз кьиле тухузва. Чи хкянавай команда дуьньяда виридалайни къуватлубурукай сад я”, — суьгьбетна Диляра Садыковади.
Манийвилер авай чамаррин Федерациядин отделение Дагъустанда алатай йисан июлдин сифте кьилера тешкилнай. Адан регьберди къейдзавайвал, спортдин цIийи жуьреди жегьил дагъустанвийрин фикир желбзава. “Манийвилер авай чамарар спортдин итижлу мярекат я. Чамарра гьам карчи спортсменри, гьакI гьевескаррини иштиракзава. И жуьредин спорт республикада вилик фидайдал шак алач”, — къейдна Гьамид Мегьамедова.
“Игитрин лига” чамарар авунин рекьяй неинки чи уьлкведа вилик жергейра ава, гьакIни адаз гьазурвилер акунин проектни туькIуьрнава. Гьа и проектдин бинедаллаз республикадин ачух майданрал спортдин и жуьредал машгъул жезвайбур патал пулсуз тренировкаяр кьиле тухузва. Абурукай сифтегьанбур Махачкъала шегьердин пляжда, гьакIни Ленинан Комсомолдин тIварунихъ галай паркуна чамарар авунин рекьяй международный чемпионри ва карчи спортсменри кьиле тухвана. Алай вахтунда сентябрдин эхирра — октябрдин сифте кьилера Хунзах райондин Матлас мулкунал алай спортдин лагерда тренировкаяр тухунин месэла веревирд ийизва. Вири Россиядай тир спортсменар ина манийвилер авай чамарар авунин дуьньядин чемпионатдиз гьазур жеда.
Федерациядин планрал асаслу яз гьакIни алай йисан зулуз Махачкъала шегьердин “Труд” стадиондал “Игитрин къугъунар” кьиле тухуда. Артем Здунова и крарин тереф хвена. Ада мярекатрик гранат гадарун ва лишанар ягъун хьтин спортдин жуьреярни кухтун теклифна.
“Чи дагълара сборра иштиракдай спортсменриз Дагъустан бегенмиш жеда, и кардал са шакни алач. Спортдин цIийи жуьре вилик финин фикирдин тереф за хуьзва. Исятда чаз квевай кIвалахдай гьакъикъи план лазим я”, — лагьана региондин премьер-министрди ва мугьманриз санал кIвалахун теклифна.
«Лезги газет»
