Азербайжандик тахсир кутуна
Сада-садаз цIай гунин гьалар акъвазарунин теклифдал амал тавуналди, Азербайжандин терефди йифен береда Эрменистандихъ галаз авай сергьятдал женгинин гьерекатар кьиле тухвана. Кьилди къачуртIа, абуру кIуьд сеферда санлай 137 гуьлле ахъайна. Идакай Facebook-да Эрменистандин оборонадин министерстводин пресс-секретарь Ш.Степаняна кхьена.
“19-20-июлдин йифен вахтунда Эрменистандинни Азербайжандин часпардал са кьадарда секинвал арадал хтанвай”, — къейдна Степаняна. Гьа са вахтунда ада баришугъвилин меслят чIурунай Азербайжандик тахсир кутуна. Адан гафаралди, Азербайжандин терефди Чамбарак хуьруьн мукьув гвай эрменийрин армиядин даяхдин пунктариз АГС-17 гранатометдай цIай гана. Жаваб яз, эрменийрини гуьлле хгуникди азербайжанвияр гьерекат акъвазаруниз мажбур хьана.
Къейд ийин, Эрменистандинни Азербайжандин сергьятдал женгер 12-июлдилай башламишна. Кьве терефдини сада-садак агьалияр яшамиш жезвай чкайриз гуьлле гунай тахсир кутазва. Авай делилрал асаслу яз, ягъунрин нетижада Эрменистандин 4 военный кьена. Азербайжанвийри 12 военный ва са ислягь уьмуьр кьиле тухузвай агьали кьейидакай хабар гана.
Амукь тавун мумкин я
Украинадин реформайрин милли советдин комитетдин кьил Михаил Саакашвилиди бязи чиновникар себеб яз уьлкве амукь тавунин къурхулувилик акатун мумкин тирди малумарна. Сиясатчиди вичин фикир “Украина 24” каналдай раижна.
Адан фикирдалди, уьлкведа исятда авай гьалар давам хьайитIа, ам амукь тавун мумкин я. Саакашвилиди чкадин гьукумдаррик тахсир кутазва. Кьилди къачуртIа, адан гафаралди, чиновникри гьукуматдин бюджетдай такьатар серфзавай “хсуси яракьлу кьушунар” арадал гъизва.
Коронавирус
22-июлдин делилралди, дуьньяда коронавирус акатайбурун кьадар 14 959 031-дав агакьнава. 616 764 кас кьена, сагъ хъхьайбурун кьадар 8 479 847-дав агакьнава. Дуьньядин 188 уьлкведа чкIанвай азар гьеле тамамвилелди яваш хьанвач.
Россияда 789 190 касдик акатнава. Кьенвайбурун кьадар 12 745-дав агакьнава, сагъ хъхьанвайбурун — 572 053-дав. И делилар 22-июлдиз “Новости” РИА-ди раижна.
Коронавирус акатнавайбурун кьадардал гьалтайла, Россия 4-чкадал ала. Виридалайни гзаф США-дин агьалийрик вирус акатнава. Кьвед ва пуд лагьай чкайрал Бразилияни Индия ала.
Россия — Туьркия
Коронавирусдин тIугъвал себеб яз акъвазарай Россиядинни Туьркиядин арада авиациядин алакъаяр 25-июлдиз гуьнгуьна хтун мумкин я. “Лента.ру” чешмеди хабар гузвайвал, Туьркиядин терефди алакъаяр гуьнгуьна гьат хъувун гуьзетзава ва 25-июлдиз бязи рейсер кьилиз акъудун фикирдиз къачунва.
Туьркиядин отелрин федерациядин президент С.Чорабатыра малумарайвал, чкадин курортрин отелра хатасузвилин жигьетдай вири серенжемар кьабулнава ва абур мугьманар кьабулиз гьазур я. Адан гафаралди, Туьркияда туризм вилик финик Россияди еке пай кутазва.
ЧIулав сиягьдик кутуна
США-дин Госдепартаментди Чечнядин кьил Рамзан Къадиров чIулав сиягьдик кутунва. “Reuters” чешмеди раижзавайвал, идакай ведомстводин кьил Майк Помпеоди ихтилатна.
Къадироваз США-диз фин къадагъа авунва. Адак гуя инсандин ихтиярар чIурна лугьуз, тахсир кутазва.
“Газпром” эвездайвал я
Израилдин гьукуматди Европа газдалди таъминардай газопровод арадал гъунин гьакъиндай Европадин уьлквейрихъ галаз икьрар кутIунунин разивал къалурна.
“Reuters” чешмеди кхьизвайвал, “Газпромдин” эвездихъ къекъвезвай Европа гила Израилди газдалди таъминарун мумкин я.
Израилдайни Кипрдай Грециядиз, Италиядиз ва Европадин маса уьлквейриз газ акъудун патал Средиземный гьуьлуьн кIаняй турба тухуда. И кар арадал гъунин къимет 6 миллиард евродиз барабар я. ТIебии газ 2025-йисуз ахъаюн пландик кутунва.
Къейд ийин, “Газпромди” Европадиз маса гузвай газдин кьадар йисан эвел кьилерилай 20 процентдин агъуз аватна. Европадин газдин гьамбарханаяр ацIанвайвиляй ана газдин къимет агъуз аватна, гьавиляй “Газпромдиз” ам маса хгун менфятлу яз амукьнач.
Гьужум алудна
И йикъара Сириядин ПВО-дин системади Дамаскдин кьилелай душманри авур гьужум алудна. Идакай Сириядин гьукуматдин “САНА” агентстводи хабар гана.
Цавай авур гьужум гьихьтинди тиртIа, гьадакай тамам делилар раижнавач.
Гуьгьуьл хкаждай няметар
Пегьризчи Т.Арсеньевадин фикирдалди, инсандин гуьгьуьлар хкажуниз куьмекдай суьрсетрик Бразилиядин кIерец, устрица, банан, мержемекар ва чIулав шоколад акатзава. Пешекарди тIвар кьунвай гьар са няметдик квай хийирдикай ихтилатна.
«Лезги газет»
