Жуван кефияр са артух куьпдик квачтIани, зун жемятдин хийирлу крарик кьил кутаз, бязи месэлаяр гьялунин карда жувавай жеривал куьмек гуз, кIвалах вилик тухуз алахъзава. Мадни лагьайтIа, рикIик са тIимил шагьвар кутадай агьвалатдикай, инсандикай ван къведатIа лугьуз, жуьреба-жуьре ихтилатарзавайбурухъ яб акализ кIан жезва жуваз.
Кимин чIехивал ийизвайбурувай, гьелбетда, хабарар гьар жуьрединбур ван жеда. Сад — руг кьилеллаз гьалай машиндикай, муькуьди -сакIани алат тийизвай коронавирусдикай, пуд лагьайди — чи ерийрин салара (месела, Макьарал) битмиш хьанвай халийрикай, кьуд лагьайди, яваш сесиналди, кIватIзавай гатарикай ихтилатар кудиз, рахаз жеда.
Гьелбетда, низ яб гудатIа кьил акъат тийизвай къенин девирда жув дикъетлу хьун чарасуз я. Инсанриз, сифте нубатда, лацу- чIулав талгьана, фу герек я: ам галачиз, къизилрин юкьва ацукьайтIани, ачух суфрадаллаз цава лув гуз хьайитIани, уьмуьр уьмуьр яз гьисабиз жедач. Гьихьтин кIвалах хьайитIани, инсанди ам сифтени-сифте анжах фу паталди ийизвайдал шак алач. Фу — и гаф чIехи гьарфаралди кхьизвайтIа, лап дуьз кар, адан дережани незвай амай затIарилай вине жедай.
Ингье гьа и фу патал алай вахтунда “Куьрхуьр” тIвар алай лежбервилинни фермервилин майишатрин магьсулдарри, галатун гьисс тийиз, зегьмет чIугвазва. Чпив гвай никIерай техилар кIватIунин женгиник Шайдаев Сефербеган, Саругъланов Вилиметан, Саругъланов Нариманан, Сийибулаев Тарланан ва масабурун магьсулдарар экечIнава. Гуьнейрин кьилерал экъечIна яб гайила, никIерин вини, агъа кьилерай ва юкьварай комбайнийрин ванер къвезва. Ида рикIик шадвал, гьевес кутазва. Техил патал женг физва эхир. Кимерални абурун четин кIвалахрикай рахаз хьанайтIа, ажеб жедай. Чими, залум, яргъи юкъуз руквадик кIвалахзава ксари. Абурун язух атун герек я эхир.
Санлай магьсулдаррин вилик 212 гектардай къуьл, мух кIватIунин везифа акъвазнава. Кьурагьвилер хьанатIани, гьар са гектарди пис нетижа гузвач. Бязи гадайри чпиз тумаризни туна, артухан техил масани гузва. Шад я и кардални. Санлай 193 гектардай техил кIватIнава. И карда тежрибалу механизатор Сефербега масабурузни куьмек гузва. Гьа са вахтунда абур туьквер къачудайбурун суракьдани ава. Гад гьарай я. Ам и йикъара агудна куьтягьдайвал я.
Райсудин Набиев
