Ватандин ЧIехи дяведа Гъалибвал къачурдалай кьулухъ, 1945-йисан 24-июндиз, Москвада, Яру Майдандал кьиле фейи парадда, санлай къачурла, 35 агъзур касди иштиракна. Абурун арада 24 маршал, 249 генерал, 2536 офицер, 31116 сержантни аскер авай.
Парадда иштиракай генералрикай, Советрин Союздин Игитрикай халкьдин гегьенш къатариз хабар ятIани, Гъалибвал къачуник чпин еке пай кутур хейлин аскерар хъендик кумукьна. Дяведин йисариз талукь документра гьатнавай малуматрай якъин жезвайвал, ЧIехи Гъалибвилин гьуьрметдай кьиле тухвай сад лагьай параддин иштиракчийрин арада лезги халкьдин кьегьал хва, ери-бине КцIар райондин Хьилерин хуьряй тир Гьажибег Шайдабегович Агъабеговни авай.
Гьайиф хьи, викIегь кьегьалдин женгинин рекьикай чавай гегьенш делилар жагъуриз хьанач. Ватандин ЧIехи дяведин иштиракчийрикай жуьреба-жуьре малуматар кIватIнавай “Память народа” сайтда авай малуматрал асаслу яз, младший сержант Гьажибег Агъабегов женгера къалурай дирибашвиляй “1941-1945-йисарин Ватандин ЧIехи дяведа Германиядин винел гъалибвал къачунай”, “Кавказ хуьнай” медалриз лайихлу хьана.
1945-йисан парадда иштиракайбурун сиягьра Кавказдай тирбурун тIварар, фамилияр гъалатIар кваз гьатнава. Я абур хайи йисар, дидедиз хьайи чкаярни къалурнавач. Гьа и сиягьра младший лейтенант Мегьамедов Ханакай Мегьамедовичан тIварни гьатнава. Чавай адан бинеяр гьинай ятIа тайинариз хьанач, амма ада Гьажибег Агъабеговахъ галаз санал Советрин Союздин тарихда кьиле фейи лишанлу вакъиада иштиракна. Ханакай Мегьамедов Кавказдай, Дагъустандай тирди адан тIварцIи, фамилияди тестикьарзава. Анжах гьи миллетдин векил ятIа, малум туш.
Гьи миллетдикай хьайитIани, абур вири Ватандин рухваяр я. Гъалибвал къачур кьегьалар! Абурун тIварарни чи рикIера эбеди я.
Фазил Дашлай
