Дуьньяда авай балугърин жуьреяр 22 агъзурдав агакьнава. “1000 суални жаваб” чешмеда балугърин жуьреяр гьатта 25 агъзурдалай гзаф ава лагьанва. Абур гьуьлени, гьакI уькIуь тушир церани яшамиш жезва. Балугърихъ галаз алакъалу итижлу делиларни тIимил авач. Ингье абурукай са бязибур.
— Угорь балугърик 550 вольтдиз барабар электричество хьун мумкин я. Абуру чпиз нез кIан хьайи гьайванар токдин къуватдалди язава. Идалайни гъейри, электричестводи абуруз чеб маса вагьши балугърин гьужумдикай хуьниз куьмек гузва.
— Электрический угордивай ва скатдивай чпин токдин куьмекдалди балкIан рекьиз жеда.
— Лацу нахадивай вичин бедендин чимивал артухариз жезва.
— Ток квай балугъар кьвед ава — угорь ва скат.
— Балугъар кьадай сад лагьай кIир 42 агъзур йис идалай вилик арадал гъана.
— 50 метрдин кьакьанвилиз лув гуз алакьзавай балугъарни ава.
— Кит хьтин наха дуьньяда виридалайни чIехи балугъ яз гьисабзава. Адан яргъивал 20 метрдиз барабар хьун мумкин я, заланвал — 30 тонндиз.
— “Парусник” тIвар алай балугъ виридалайни йигинди я. Адан йигинвал автомобилдиндаз барабар я. Са сятда адавай 109 километрдин мензилдиз сирнавиз жеда.
— Виридалайни гзаф балугърин жуьреяр Амазонка вацIа ава.
— Камбала балугъдин кьве вилни са пата ава. И жуьредин балугъар мад дуьньяда гьалтзавач.
— Балугърин лужар са шумуд миллиондикай ибарат хьун мумкин я.
— Электричестводикай хабар авачир заманайра римлуйрини грекри скат адетдинди тушир къуват авай балугъ яз гьисабзавай.
«Лезги газет»