Аялрин поликлиникаяр ва сифтегьан куьмек гузвай медидарайрин аялрин отделенияр лазим тир тадаракралди таъминарун патал Дагъустандиз федеральный бюджетдай 5,9 миллион манатдин такьатар ахъайда. ТАСС-ди хабар гузвайвал, РФ-дин Гьукуматдин къарар “Pravo.gov.ru” официальный порталда чапнава.
Алатай йисуз Дагъустандин шегьеррин, районрин 30-далай гзаф поликлиникаяр патал 297 миллион манатдихъ медтехника маса къачунай. РД-дин здравоохраненидин министерстводин пресс-къуллугъди хабар гайивал, а такьатар республикада “Здравоохранение” милли проект кьилиз акъудунин сергьятра аваз чара авуна.
Июндин эхирра россиявийрихъ элкъвена рахадайла, РФ-дин Президент Владимир Путина медицинадин куьмекдин ери хкажунин ва мумкинвилер артухарунин чарасузвал къейдна. Президентдин гафаралди, махсус программаяр уьлкведа кьилиз акъудун патал 500 миллиард манат фикирдиз къачунва.
«Лезги газет»
