Чи ватанэгьлияр — гьар сана
Уьлкведин жуьреба-жуьре пипIера авай лезгийрикай, абурун крарикай чав мукьвал-мукьвал хабарар агакьзава. И мукьвара малум хьайивал, Адыгея республикадани хейлин лезгияр яшамиш жезва. Абурукай сад тир Эдуард Рамазанович Рамазанов Майкопда карчивилел машгъул я.
Эдуард Рамазанов 1973-йисан 4-июндиз Кьурагьа дидедиз хьана, ана мектеб куьтягьна. 1990-йисуз Къизлярдиз куьч хьана ва ана КЭМЗ заводда кIвалахна. 1991-1993-йисара Советрин Армиядин жергейра буржи тамамарна. Гуьгъуьнлай, 1993-1999-йисара, Къизляр шегьердин къенепатан органра къуллугъна.
1999-йисалай Майкоп шегьерда ОМОН-дин подразделенидик экечI хъувуна. Эдуард женгерин гьерекатрин ветеран я. Ватанэгьлиди 1996-йисуз, 1999-йисузни Чечняда террористриз аксивалунин женгера иштиракна. Органрин къуллугъдилай 2000-йисуз вичин хушуналди элячIна. 2000-2005-йисара Адыгеяда Дагъустан Республикадин гьамишан векилханада кIвалахна. 2005-йисалай эцигунрин рекьяй вичин хсуси бизнесдал машгъул хьана. Исятда ам алишверишдин «Гияр» дараматдин генеральный директор я. Хизанда пуд веледдиз тербия гузва.
Майкопда, Адыгеядин меркезда, РД-дин векилхана кардик кваз 20 йисалайни гзаф, адан председатель Асильдаров Чупан Юсупович я. Векилханади дагъустанвийрихъ (карчийрихъ, студентрихъ ва масабурухъ) галаз датIана кIвалах тухузва, Адыгеядин, Дагъустандин жуьреба-жуьре къурулушри тешкилзавай мярекатра Э. Рамазановани иштиракзава.
Къейд ийин, “Международный бандитрин кIеретIар барбатIайдалай инихъ 20 йис” юбилейдин медалдалди РД-дин Кьилин къарардалди Адыгея республикада 4 кас, гьа жергедай яз Эдуард Рамазановни къейдна.
Чна фикир гузвайвал, кьисметди чеб акъуднавай чкайра, маса миллетрин, халкьарин арайра лайихлувилелди, гьакъисагъвилелди, къанунлувилелди, савадлувилелди ва чешнелувилелди уьмуьр кьиле тухузвай лезгияр гзаф ава. Лезгийриз чеб масакIа тухун кутугни авунвач. Къуй абурухъ гьар са камуна агалкьунар хьурай!
«Лезги газет»
