И йикъара Докъузпара райондин агьалийрив пашман хабар агакьна: чи арадай баркаллу инсан, “РД-дин жегьилрин лайихлу насигьатчи” Дадашев Дадаш Мирзеагъаевич акъатна.
Д.Дадашев 1940-йисан 30-октябрдиз Ахцегь райондин Мичегьрин хуьре дидедиз хьана. 1961-йисуз ада Хасавюрт райондин Къурушрин мектеб, Хасавюртдин педучилище яру дипломдалди акьалтlарна. Къурушрин хуьруьн мектебда тарсар гуз, ада ДГУ-да заочнидаказ кьилин тагьсилни къачуна.
1989-йисуз Дадаш муаллим Дербент шегьердиз куьч хьана. Кьве йисуз ракьун рекьин училищеда ва 14-нумрадин юкьван школада математикадай чирвилер гана.
Дербент райондин мулкара Докъузпара райондин Авадан хуьр бинеламиш хьайила, Дадаш Дадашев вичин хизанни галаз гьаниз куьч хьана. Ина “Аваданский” совхоздин профкомдин председателвиле, 1995-йисалай 2001-йисалди Авадан хуьруьн администрациядин кьиле зегьмет чIугуна. Чкадин жемят патал хийирлу гзаф кlвалахар тамамарна: хуьр бес кьадарда хъвадай ва дигидай целди таъминарна, куьчейра чиргъ туна, хуьруьн мектебдин материально-технический база мягькемарна, медпункт ачухна, “Южный” лагерь кардик кутуна. Ада чи районда кьиле физвай хийирлу мярекатра активнидаказ иштиракзавай, жегьилриз меслятар къалурзавай. Дадаш Мирзеагъаевича вичин уьмуьрдин чешнедалди чаз хийирлу ирс туна. Чидайбурун рикlера ам гьамишалугъ яз амукьда.
“Докъузпара район” МР-дин кьилин
везифаяр тамамарзавай Агьмед Агьмедов,
муниципалитетдин депутатрин собранидин
ва Авадан хуьруьн администрициядин коллектив
