Лезги халкьдихъ яратмишунрин ва искусстводин рекье экуь гел тур ксар гьар са де­вир­да хьайиди я. Абурун абурлу крар давамарзавай рухваярни рушар чахъ къенин юкъуз­­ни ава. Нубатдин макъалани ахьтинбу­рукай сад тир актриса  Эмина  Вагьабовадикай я. Алай вахтунда ада Лезгийрин СтIал Сулейманан тIварунихъ галай госмуздрамтеатрда зегьмет чIугвазва — сегьнеда вичин ус­тадвал ва алакьунар къалурзава. Адалай тамашачийрин патай еке гьуьрмет къазанмишиз алакьнава.

Э.Вагьабова Хив райондин АрхитIрин хуьре дидедиз хьана. 1992-йисуз хайи хуьруьн юкьван школа акьалтIарна. Аял чIавалай манияр лугьуз, кьуьлер ийиз пара кIандай ру­ша гьеле мектебда кIелзамаз гьевескар ар­тист­рин кружокда иштиракзавай ва вичин ус­тад­вал сегьнедилай къалурун адан мурад тир…

Йисар къвез алатна. Рушан мурад кьилиз­ акъатна. 2010-йисуз адакай Лезгийрин гос­муздрамтеатрдин актриса хьана. Театрдиз­ акъатун  ада вичиз кьисметди гайи виридалайни еке пишкеш, вичин уьмуьр театр галачиз фикирдиз гъиз тежедайди яз гьисабзава.

2015-йисуз жегьил руш пешекарвал къачун патал Махачкъалада кардик квай СССР-дин халкьдин артистка Барият Мурадовадин тIварунихъ галай Дагъустандин культурадин ва искусстводин колледждик экечIна.

Сегьнеда зегьмет чIугваз алатнавай йисар мана-метлебдив ацIанвайбур, устадвал, пешекарвилин дережа мадни хкажайбур хьана. Эмина Жамирзаевнади къенин йикъалди 20-далай виниз ролар къугъвана, жуьреба-жуьре къилихрин сагьибрин къаматрал чан гъана. Абурун жергедай тир А.Айларован пье­садин бинедаллаз режиссёр А.Батырова эцигнавай “ЧIулав дагъви” тамаша заз иллаки хуш хьана. Эмина Гуьзелан ролда къугъвазва. Эсердин бинеда актёррин къугъун ава. Амни, чи ватандаш рушан иштираквални аваз, абуру­ еке устадвилелди, тамашачияр гьейранардай тегьерда кьилиз акъудзава. Са гафуналди, тамашади неинки тамашачийрин гуьгьуьлар, гьевес хкажзава, чахъ лезги театр вилик туху­дай жегьил къуватар авайдини тестикьарзава.­

Лезги театрдин кьилин режиссёр хьайи Дагъустандин халкьдин артист Мирзабег Мир­забегова А.Абдулгъапурован “Зирек Алмас” тамаша-махунай эцигнавай сегьнеда Эмина Вагьабова кьилин ролда (Алмас) къугъ­вана. Аялар патал тир и тамаша вичин макьсаддив агакьна. Сегьнедин устадрилай, гьа гьисабдай яз Эминадилайни режиссёрди вилик эцигнавай идеядин ва художественный кьетIенвилер хуьз алакьуналди, аялар патал тир и тамаша манадал гьалтайлани пара девлетлуди хьана.

КьетIендаказ заз мадни а кар къейд ийиз кIанзава хьи, Э.Вагьабовадихъ режиссёрди теклифай жуьреба-жуьре ролар, игитрин къилихар, лугьурвал, гьасятда кьацIа гьатна тамамардай бажарагъвал ава. Кьилиндини, ам зегьметдал гзаф рикI алай инсан я. Къилихдин и ериди инсандин вилик еке мумкинвилер ачухзавайди сир туш. Актрисадилай режиссёр-постановщикдин фикир кьатIуз ва сегьнедал и кар устадвилелди кьилиз акъудиз алакьзава. ЦIийи гьар са ролди чаз адан къилихдин цIийи ерияр къалурзава. Э.Вагьабова къугъвай ролри и кардин гьакъиндай шагьидвалзава. Ингье абурукай са шумуд: Т.Минуллин — “Ялгъузди” (Дагъустандин халкьдин ар­тист М.Мирзабегова эцигнавай тамашада Мадинадин ролда), Ш.Къазиев — “Нисрединан къизилдин лам” (К.Думаева эцигнавай тамашада Фатимадин ролда), А.Мегьман — “ЦIа­рубегни Харубег” тамашада (Лусинадин ролда), У.Гьажибегов — “Аршин мал алан” (А.Мегьамедрагьимова эцигнавай тамашада Асядин ролда), М.Шамхалов — “Къа­ри” тамашада (Севдадин ролда) ва масабур.

Ингье адакай  Лезги театрдин кьилин режиссёр ва актёр Казбек Думаева вуч лугьуз­ва­тIа: “Эмина бажарагълу, зегьметдал рикI алай, датIана вичин винел кIвалахзавай жегьил актрисайрикай сад я. Яратмишунрал ри­кIивай машгъул тир гьар са касдин рехъ четинди я, гьатта къугъун анжах мурад тир, гзаф­ рикI алай ролар­ тамамариз хьайитIани. Заз гьич са сефердани Эмина Вагьабова репетициядиз гьазур тахьана­ атана акурди туш. Масадбурув гекъигиз тежер хьтин артух яратмишунрин алем ава адахъ”.

Яратмишунрин рекье къалурнавай алакьунрай Эмина Вагьабовадиз Лезги театрдин кьиле авай ксари гьуьрметдин грамотаяр ганва.­

Гьар са пешеди  инсан лигимарзава, са вуч­ ятIани чирзава, жув ва масабур тийижир патарихъай ачухариз куьмекзава. Актёрвилин пешеди лагьайтIа, мадни еке мумкинвилер — вичин игитрин акьулдалди ва рикIелди яшамиш жедай майданни ачухзава.

Чи мурад Э.Вагьабовадихъ мадни еке ­ку­кIушар муьтIуьгъардай къуватар, сагъвал  хьун я.

Эдуард  Багъишев,

Дагъустандин халкьдин артист