Хуьрерин администрацийра

И йикъара зун Хив райондин Кашанхуьруьз акъатна, ана администрациядин кьил Се­фи­бегов  Вадим  Сефибеговичахъ  галаз таниш хьана, админист­рациядик акатзавай хуьрерин гьаларикай, авунвай ва ийизвай кIва­лах­рикай, вилик акъвазнавай ве­зифайрикай, къай­гъуй­рикай суьгьбетна.

Вадим Сефибеговича чаз лагьайвал, администрациядик 134 кIвал авай Кашанхуьр, 58 кIвал авай Дардархуьр ва 117 кIвал авай ЧIили­хъар акатзава. И пуд хуьре 2050 агьали яшамиш жезва.

— Гьелбетда, хуьрера тухуз алакьай кIвалахар тIимил туш, — ихтилатзава администрациядин  кьили. — Куьлуь-шуьлуьйрал зун акъваздач, 2019-йисуз тухвай са бязи кIва­лах­ри­кай рахада. Къачун чна Дардархуьр. Хъвадай цикай дарвал аваз хьуниз килигна, халкьдин куьмекни галаз, чна ана къуй яна, хуьруьн юкьвал 20 тонндин цистерна эцигна. Хуьруьнвийри яд кIва­лериз тухванва. Хуьре цIийи трансформатор эцигна, паркуна плитаяр туна.

Хуьруьн яшлу инсанрин теклифдалди Дардархуьре цIийи мис­кIин эцигна куьтягьнава, алай вахтунда анаг тадаракламишунин кIва­лахар давамарзава.

Кашанхуьре хъвадай цин 15 тонндин цистерна эцигна, бес тежезвай куьчейриз яд акъудна.

Хуьруьн къенепата зирзибилдин хъуртар авай. Абур акъудна, парк туь­­кIуьриз гатIуннава. Бюджетдин пулунилай гъейри куьмек гузвай спонсорарни ава.

4 куьчедиз хирхем вегьена. Хуьре 1979-йисуз тухванвай водопровод ава. Ана чна 465 метрдин турбаяр дегишарна­.

ЧIилихърал 4 куьчедиз хирхем вегье­на, къайдадиз гъана. Хуьре цIийи  трансформатор эцигна.

Михьивал сагъламвилин замин я. Гьавиляй чна хуьрера михьивал хуьниз, санитариядин истемишунрал амал авуниз екедаказ фикир гузва. ИкI, пуд хуьряйни вацра зирзи­­бил кIватIзава, Дербентдиз тухузва­.

Ихьтин са карни къейд ийин. Кашанхуьряй Дардархуьруьз, ЧIи­лихъ­рал са-са километр мензил ава. И мукьвавили чаз пуд хуьрени  социальный месэлаяр санал гьялдай мумкинвал гузва.

• Хуьрера общественный гьихьтин идараяр кардик ква, абурун кIва­лах­рилай вун ва агьалияр рази яни?

— Пуд хуьрени клубар, библиотекаяр, фельдшервилинни акушервилин пунктар, школаяр кардик ква. Абурун кIвалахни чи кьетIен ва гьар йикъан гуьзчивилик ква. Агьалийрин патайни чаз арза-ферзе авур дуьшуьшар лап тIимил жезва. Кашанхуьруьн культурадин кIвал чи патара хъсанбурукай, адан дарамат гуьрчегбурукай сад я. Тамашачийрин залда цIийи скамейкаяр эцигнава, анаг хъсандаказ тадаракламишнава. Культурадин кIвалин вилик, Ватандин ЧIехи дяведа телеф хьайибур эбеди яз рикIера хуьнин лишан, мармардин цIийи гуьмбет эцигнава, ана вири кьегьалрин тIварар кхьенва.

Кашанхуьруьн юкьван школадин дарамат куьгьнеди я. Чун цIийи дарамат эцигунин къайгъуйрани ава. Мадни, чахъ хуьре мини-футболдин майдан туькIуьрдай, аялрин бахча ачухдай фикирни ава.

Хуьрера футбол, волейбол къугъ­вадай майданарни кардик ква.

• Хуьрерин агьалийрин яша-йиш гьикI я? Абур квел машгъул жезва?­

— Маса хуьрерай хьиз, чи поселенидик акатзавай хуьрерайни гзаф  жегьилар патарал фенва. Гаф кватай чкадал лугьун: гьа и кар себеб яз, хуьрера хийирдин са кар-кIва­лах ийидайла, субботникар туху­дай­ла, чаз чкадал бес кьадар куьмекар жезвач. Хуьрера амайбур яшариз акъатнавай инсанар я кьван.

ЯтIани чи агьалияр мугьманперес, зегьметдал рикI алайбур я. Абурун яшайишни пис туш. Хуьрера техилар цазвай арендаторрин кьадар йи­салай-суз артух жезва. Абуру къуьл, гъуьр, алаф пул га­на маса къачузвач лагьайтIани жеда. Хуьрера З СПК кардик ква. Асул гьисаб­дай­ агьалияр мал-къара хуьнал маш­гъул я. Векьин уьруьшрин, тIе­бии чIура­рин патахъай кьитвал авач.

Умуд кутазва хьи, хуьрериз яваш-яваш патарал алай жегьилар хкведа, чпин кIвалин, майишатдин къайгъуйрал машгъул жеда.

Гьелбетда, хуьрера гьялна кIан­завай месэлаярни амачиз туш. Чун абурун къайгъуда ава. Хуьруьн администрациядихъ 9 депутатдикай ибарат тир совет, теклифар гузвай тешкилатарни ава. Умудлу я хьи, абу­­рун куьмекни галаз чалай вилик акъвазнавай месэлаяр гьялиз, агьа­лийрин яшайишдин шар­тIар хъсанариз алакьда.

Хазран  Кьасумов