Къалп суьрсетдихъ галаз женг чIу­гунин макьсаддалди алай йисан 1-июлдилай  РФ-дин субъектра, гьа гьисабдай­ яз Дагъустандани бязи шейэр рекъемрин куьмекдалди чарасуздаказ маркировка авунин къайда къуватда гьатзава. Идакай маркировкадин милли  “Гележег авай технологияр виликди тухунин центр” къурулушдин оператордин пресс-къуллугъди хабар гузва.

Алишверишдин сетра маса гун патал сифтени-сифте чарасуз яз маркировка авуна кIанзавай шейэрин сиягьдик дарманар, пIапIрусар ва кIвачин къапар акатнава. Июлдин эвелдилай башламишна и шейэр, идалай вилик акъуднавай дарманар (абур ишлемишдай вахт алатдалди маса гуда) галачиз,  ре­къемрин маркировка алачиз маса гудай ихтияр авач.

Ихьтин цIийивилин асул макьсад базар къалп ва контрафактный, яни законсуз рекьералди  уьлкведиз гъанвай метягьдикай михьи авун я.

И серенжем шейиниз гьеле ам акъуд­завай вахтунда рекъемрин код гуналди кьилиз акъудда. Гьар са код вичиз тешпигь авачирди жеда, и кар себеб яз, ­метягьди, ам акъуднавай чкадилай ма­са гузвай чкадал агакьдалди атIузвай рехъ (гьатта маса къачунвай шей эл­къуьрна туьквендиз вахкай дуьшуьшарни кваз)  ахтармишиз жеда.

Муьштеридивай, мобильный те­лефонра авай “Намуслу лишан” приложенидин куьмекдалди маса къачунвай шейиникай тамам делилар чириз жеда.

Криптографиядин лишандалди хуьзвай шей, месела, азарханадиз чара авун­вай дарман,  туьквендин кассовый аппаратдай ракъуриз жедач. Гуьзлемишзавайвал, 2024-йис алукь­далди шейэр рекъемралди маркировка авунин системади  саки вири производство кьада.

«Лезги газет»