Чи ватанэгьлияр — гьар сана

Кьве йис идалай вилик чна газет кIелзавайбур РФ-дин лайихлу духтур, медицинадин илимрин док­тор, здравоохраненидин хиле гзаф йисара зегьмет чIугунвай ва гьакъисагъвилелди давамарзавай   Хийир  Тагьирович  Абдулкеримовахъ  галаз танишарнай.

И йикъара Хийир Абдулкеримовахъ хьанвай мад са чIехи агал­кьундикай адан ярар-дустари чав хабар агакьарна. Малум хьайивал, 2020-йисан Вирироссиядин духтуррин конкурсдин “Лап хъсан оториноларинголог” номинацияда Х.Абдулкеримова сад лагьай чка кьуна. 36 номинациядикай ибарат чIе­хи конкурсда санлай 526 лайихлу духтурди иштиракна. Гъалибчияр и йи­къара РФ-дин здравоохраненидин министр Михаил Мурашкодин председателвилик квай конкурсдин кьилин комиссияди тайинарна.

Ахцегь райондин Калук хуьряй тир Хийир Абдулкеримов 1986-йисалай Уралда яшамиш жезва. Ина ам оториноларингологиядин ва нейрохирургиядин рекьяй тIвар-ван авай пешекар, Уралдин федеральный округдин ва Свердловскдин областдин кьилин отоларинголог, Уралдин гьукуматдин медицинадин академиядин профильный кафедрадин заведующий, профессор, Екатеринбургдин 40-нумрадин ГКБ-дин оториноларингологиядин отделенидин заведующий я.

Пешедин рекьяй сифтедай духтурди Тюменда, Агъа Тагилда кIва­лахна, гуьгъуьнлай ам Екатеринбург шегьердиз акъатна. Медицинадикай хъсан хабар авай алим яз, Хийир Тагьировича 300-дав агакь­на илимдин кIвалахар, гьа жергедай яз 5 монография, студентар патал 15 пособие кхьена.

Нуфузлу пешекар гьамиша кIва­­лахдик, гьерекатдик ква. Ам не­рай гипофиздин лап четин операцияр кьилиз акъудзавай тежрибалу хирург я. Ихьтин операцияр кьилиз акъудиз жезвай хирургар чи уьлкведа са акьван гзаф авач.

Хийир Тагьировичан регьимлувиликай, дикъетлувиликай, бажарагълувиликай чпин патай интернетдин сайтда алхишдин гафар кхьизвайбуру ам Аллагьдин патай пай ганвай кьетIен пешекар яз гьисабзава.

Къейдна кIанда хьи, Абдулкеримоври саки духтуррин сихил ара­дал гъанва. Хийир Тагьировича­ уьмуьрдин юлдаш Зубейда Сей­фуллагьовнадихъ галаз пуд хва чIехи авунва. ЧIехи кьве хвани духтурар я.

Х.Абдулкеримова медицинадин илимрин кандидатвилин диссертация 1996-йисуз Санкт-Петербургдин С.М.Кирован тIвару­нихъ галай Военно-медицинский академияда ва докторвилин диссертация 2003-йисуз Санкт-Петербургдин И.П.Павлован тIварунихъ галай медицинадин госуниверситетда хвена.

Россиядин оториноларингологрин илимдин кIватIалдин президиумдин член, и рекьяй Свердловский областдин ва Уралдин кьилин пешекар, Свердловский областдин здравоохраненидин министерствода оториноларингологиядин рекьяй­ медицинадин къуллугъчияр аттес­тация авунин комиссиядин председатель, гьа и пешедай РФ-дин  Мин­­здравдин бюродин член, Свердловский областдин патай Вирироссиядин “Объединение ЛОР педиатров”  жемиятдин ассоциациядин член я.

Хийир духтурди гьар йисуз вичин гъвечIи ватандиз хъфидай мумкинвилерни жагъурзава.

Чна Хийир Тагьировичаз къазанмишнавай цIийи агалкьун мубаракзава. Къуй адахъ чандин сагъвал ва кIвалахда мадни зурба агал­­­кьунар хьурай!

К.Ферзалиев