Субтропикра жедай хьтин, чпиз тешпигь авачир культураяр битмишарун ва чай гьасилунин кар виликди тухун патал Сочида Россиядин илимрин академиядин субтропикрин илимдин центр тешкилнава.
“Федеральный ахтармишунардай центр РАН-дин кьве идара — Вирироссиядин илимдинни ахтармишунардай цуькчивилин ва субтропикрин культурайрин институт ва Сочида авай РАН-дин илимдинни ахтармишунардай центр сад авуналди арадал гъанва”, — хабар гузва ахтармишунардай центрадин пресс-къуллугъди.
1894-йисуз Сочидин багъларин ва хуьруьн майишатдин тежрибадин станция хьиз арадал гъанвай Цуькчивилин ва субтропикрин культурайрин институт уьлкведин илимдин кар алай тешкилат яз гзаф йисар я. Ам арадал атай чIавалай инихъ алатнавай 125 йисан вахтунда уьлкве патал багъманчивал кьиле тухунин къайдадин, промышленный цуькчивилин бинеяр арадал гъанва. Битмишарзавай чкайрив кьадай жинсер ва сортар арадал гъунин кIвалахдин нетижада Россиядин мулкунал чай, цитрусдин ва лаврдин тарар, фундухар гьасилдай мумкинвал хьанва.
“Цуькчивилин ва субтропикрин культурайрин институтдин бинедаллаз арадал гъанвай емишрин ва цуькверин сортар гьам ватанда, гьамни къецепатан уьлквейра авайбурулай усалбур туш. И кIвалахдин кар алай хилерик экономика патал важиблу месэла — уьлкведа чай гьасилунин хел арадал хкун ква. Ина кьиле тухузвай ахтармишунри культура экъечIуниз ва адахъ гелкъуьниз талукь вири терефар гьисаба кьунва”, — къейдзава пресс-къуллугъди.
И хилерилай гъейри, РАН-дин субтропикрин илимдин центрада РАН-дин Сочидин илимдинни ахтармишунрин центрадин алимри экономикадин, социологиядин ва экоологиядин рекьерай кьиле тухузвай ахтармишунарни давамарда.
“Вилик эцигнавай аслу месэлайрикай сад ботанический “Дуствилин Тар” багъ гзаф жуьре культурайрин ва миллетрин арада авай алакъайрин центр яз виликди тухуниз талукь комплексный план уьмуьрдиз куьчуьрмишун жеда”, — лугьузва пресс-къуллугъдин малуматда.
«Лезги газет»
