23-июндиз Урусатдин Президент Владимир Путин уьлкведин агьалийрихъ элкъвена рахана. Кьилди къачуртIа, ада йисан къене 5 миллион манатдилай гзаф къазанжияр къазанмишзавайбур патал НДФЛ-дин кьадар хкаж жезвайдакай, аялар патал алава пулдин куьмекар гудайдакай, коронавирусдихъ галаз тухузвай женгинин нетижайрикай хабар гана. Агъадихъ чун абурукай кьилди-кьилди рахада.
НДФЛ-дин кьадар ва бизнесдиз куьмек
Владимир Путина 2021-йисан 1-январдилай йисан къене 5 миллион манатдилай гзаф къазанжияр къазанмишзавайбур патал НДФЛ-дин кьадар 13-далай 15 процентдал кьван хкажун теклифна. Ада къейд авурвал, налогрин хкажнавай кьадар вири къазанжийриз талукь туш, ихтилат йисан къене 5 миллиондилай алатзавай паюникай физва.
Гьа са вахтунда уьлкведин Президентди алава хъувурвал, НДФЛ хкажунин нетижада гьар йисуз бюджетдиз алава 60 миллиард манат къведа. И такьатар тек-туьк жедай азарар квай аялар сагъар хъувуниз чара ийидайвал я.
Владимир Путина Урусатдин Гьукуматдал инфраструктура вилик тухун патал яргъал вахтунда пулдин такьатар чара ийидай алатрикай (къайдайрикай) гегьеншдиз менфят къачунин жигьетдай теклифар гьазурун тапшурмишна. Идалай гъейри, ада 2021-йисуз зегьметдин базар тамамдиз арадал хкун патал лазим тир серенжемар кьабулунин буйругъни гана.
Агьалийриз куьмек гунин серенжемрикай
Уьлкведин Президентди хабар гайивал, июлдин вацра 16 йисал къведалди яшара авай аялриз алава 10 агъзур манат пул гуда. РикIел хкин, ихьтин куьмек майдин вацрани ганай. Кьвед лагьай сеферда гузвай пулдин такьатар вахчун патал цIийи кьилелай арзаяр гьазурунин лазимвал авач. Абур сад лагьай сеферда чара авур пулдин такьатар къачун патал гьазурай документрин бинедаллаз агакьарда.
Владимир Путина гьакIни кьезилвилер гузвай ипотекадин программа гегьеншарунин тапшуругъни гана. Гила кьезилвилер гузвай ипотека Москва, Санкт-Петербург шегьерра, Москвадин ва Ленинграддин областра — 12, амай регионра 6 миллион манатдал къведалди къимет авай кIвалер маса къачудайла чара ийида.
Мадни, коронавирусдихъ галаз алакъалу яз кIвалах амачиз амукьнавай агьалийриз июлдин, августдин варцарани пулдин куьмек гуда.
ТIугъвалдихъ галаз тухузвай женгина иштиракзавай яшайишдин рекьяй кардик квай къуллугърин векилриз (социальные работники) гузвай алава пулдин куьмекни 15-сентябрдал кьван давамарда.
ТIугъвалдиз акси женгиникай
Владимир Путинан фикирдалди, алатай пуд вацран къене уьлкведин агьалийрин уьмуьрда еке дегишвилер кьиле фена. Урусат тIегъуьндиз акси женгинив кIевелай эгечIна ва и жигьетдай кьабулай серенжемри хъсан нетижаярни арадал гъана. Президентди къейд авурвал, уьлкведин медицинади вичивай садлагьана арадал атай акьалтIай четин шартIара менфятлудаказ кIвалахиз жезвайди къалурна. Коронавирусдихъ галаз алакъалу яз тайинарай сергьятри, къайдайри, кьабулай маса серенжемри цIуд агъзурралди инсанар кьиникьдикай къутармишиз куьмекна, — гьисабзава Президентди.
Чи мухбир
