24-июндиз Урусатдин вири регионра хьиз, Дагъустандани Ватандин ЧIехи дяведа къазанмишай Гъалибвилин 75 йис тамам хьуниз талукьарнавай Парад кьиле фена. Асул мярекатар Каспийск шегьердин кьилин майдандал тешкилнавай. Коронавирусдин тIугъвалдихъ галаз алакъалу яз, Гъалибвилин Парад кьетIен шартIара кьиле фена.
“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, шадвилин мярекатда РД-дин Гьукуматдин Председатель Артем Здунова, Дагъустандин Халкьдин Собранидин Председатель Хизри Шихсаидова, РД-дин Кьилин ва Гьукуматдин Администрациядин руководитель Владимир Иванова, республикадин министерствойринни ведомствойрин, шегьерринни районрин администрацийрин кьилери, ветеранри, волонтерри ва гьуьрметлу мугьманри иштиракна.
Парад контр-адмирал, Каспийскдин флотилиядин командующий Сергей Пинчука кьабулна, регьбервал адан сад лагьай заместитель, 1-рангдин капитан Сергей Екимова гана.
Екимова журналистриз хабар гайивал, мярекатда, санлай къачурла, са агъзурни вад виш касди, дяведин ва махсус техникадин 25 уьлчмеди, 10 самолетдини вертолетди иштиракна.
Трибунайрилай Парад кьиле физвай къайдадиз Ватандин ЧIехи дяведин 10 ветеран килигзавай. Гьайиф хьи, бязи себебар аваз, теклифнавай вири ветеранривай мярекатдиз къвез хьанач. Абурукай гзафбур Параддиз интернетдин куьмекдалди онлай къайдада килигна.
Ленинан тIварунихъ галай майдандал Каспийскдин флотилиядин штабдин офицерри, гимийрин 106-бригададин хсуси составди, дишегьлийрикай ибарат тир ротади, гьуьлуьн пехотадин 177-полкунин къуллугъчийри, Дагъустандин МЧС-дин, Росгвардиядин векилри шадвилин марш кьиле тухвана. Абурухъ галаз санал и карда Ватандин ЧIехи дяведин 10 фронтдин тIаратIар гвай аскерри, Мосинан винтовкаярни Шпагинан тапанчияр гвай къуллугъчийрини иштиракна.
Гуьгъуьнлай майдандал дяведин махсус техникадин уьлчмеяр пайда хьана. Абур “БТР-82А” бронетранспортеррикай, реактивный къурулушрикай, ракетайрин комплексдикай ибарат тир.
Са арадилай Каспийскдин цавуз 4 вертолетдини 6 самолетди лув гана. Летчикри цава пешекарвилелди чпин устадвал къалурна.
Нянин сятдин 10-даз шегьерда ЧIехи Гъалибвилиз талукьарнавай салютар ахъайна.
Къейд ийин хьи, 2002-йисалай инихъ Каспийскда цIи Парад сад лагьай сеферда кьиле фена.
* * *
Ватандин ЧIехи дяведа къазанмишай Гъалибвилиз талукьарнавай кьилин Парад 24-июндиз Москвада кьиле фена. “Kremlin.ru” сайтди хабар гузвайвал, шадвилин мярекатда иштиракун патал уьлкведин меркездиз Абхазиядин Президент Аслан Бжания, Белоруссиядин Президент Александр Лукашенко, Къазахстандин Президент Къасим-Жомарт Токаев, Къиргъизиядин Президент Сооронбай Жээнбегов, Молдавиядин Президент Игорь Додон, Сербиядин Президент Александр Вучич, Тажикистандин Президент Эмомали Рагьмон, Уьзбекистандин Президент Шавкат Мирзиёев, Кьиблепатан Осетиядин Президент Анатолий Бибилов, Босниядин ва Герцеговинадин Президиумдин член Милорад Додик мугьман хьанвай. Абур Урусатдин Президент Владимир Путина Кремлдин Гербдин залда кьабулна.
Парадда, санлай къачурла, 14 агъзур военный къуллугъчийри, дяведин техникадин 200-далай виниз уьлчмейри, 75 самолетдини вертолетди иштиракна. Парад уьлкведин оборонадин Министр, армиядин генерал Сергей Шойгуди кьабулна, регьбервал армиядин генерал Олег Салюкова гана.
Къейд ийин хьи, Урусатдин военный къуллугъчийрихъ галаз санал Парадда Азербайжандин, Эрменистандин, Белоруссиядин, Индиядин, Къазахстандин, Къиргъизиядин, Китайдин, Молдавиядин, Монголиядин, Сербиядин, Тажикистандин, Туьркменистандин ва Уьзбекистандин яракьлу къуватрин векилрини иштиракна.
Параддин сергьятра аваз кьилин рахунар уьлкведин Президент Владимир Путина авуна.
Чи мухбир
