Банкоматрай ракъурайтIа…

Гатун эвел кьилерилай Сбербанкдин банкоматрай кьилиз акъуд­завай вири переводар пулдихъ хьанва. Ракъурзавай пулдин­ кьадар гьар гьихьтинди хьайитIани, ватандашар са процент комиссия гуниз мажбур жезва. Идакай “Новости” РИА-ди хабар гана.

Къейдзавайвал, регионрилай аслу тушиз, кьазвай пулдин (комиссиядин) кьадар 1 агъзур манатдилай артух жедач. ЦIийи къайда 2-июндилай кардик кутунва.

Кредитдин тешкилатди раижайвал, гзаф муьштерийри сада-садаз “Сбербанк-онлайндин” ва “СМС-банкдин” куьмекдалди пул ракъурзава. И дуьшуьшра 50 агъзур манатдин кьадардал кьван ракъурзавай пул гьавая кьилиз акъудиз жезва.

Агъуз аватзава

24-июндин делилралди, Россиядин 85 регионда санлай 606 881 касдик коронавирус акатнава. 8513 кас кьенва, 368 822 — сагъар­ хъувунва. “Интерфакс” чешмеди кхьизвайвал, вирус акатзавайбурун кьадар югъ-къандавай тIимил жезва.

24-июндиз дуьньяда вирус акатнавайбурун кьадар 9 266 021-дав агакьна. Санлай къачурла, дуьньяда 477 643 кас вирусди кьена. 4 632 645 кас сагъ хъхьана.

КукIун-чухун галачиз

Белоруссиядин президент А. Лукашенкоди яракьар гзаф арадал гъунин чарасузвиликай малумарна. Идакай “Лента.ру” чешмеди хабар гана.

Ада гуьлле гудай яракьар, женгинин суьрсетар арадал гъунин­, гьакIни алай аямдин яракьар, гьа жергедай яз ракетайрин комплексар арадал гъунин карни вилик тухун герек яз гьисабзава.

Лукашенкодин фикирдалди, уьлкве къецепатай экономикадин жигьетдай басрухдик кутун мумкин я. “Вучиз лагьайтIа чахъ га­лаз дяве авун хаталу я, амма уьлкведин дережа агъуз ийиз кIан­­за­вай­бурни ава”. Белоруссиядин регьберди вири месэлаяр ислягьвилелди гьялуниз, кукIунрик-чухунрик кьил кутун тавуниз эвер гана.

Духтурар кьит я

Россияда духтуррин кьитвал 20 процентдикай ибарат я. Ихьтин делилар Сеченован тIварунихъ галай Москвадин Сад лагьай медицинадин университетдин ректор П.Глыбочкоди малумарна. Адан гафар “ТАСС” чешмеди раижна.

Здравоохраненидин хиле пешекарар кьит хьунин месэла гьялун патал Глыбочкоди профилдинбур тушир университетра медицинадиз талукь факультет ачухун теклифна.

Къейдзавайвал, гзафни-гзаф Камчатский крайда духтурар бес жезвач.

Наразивал

Токиодин мулкара США-диз ракетайриз акси оборонадин­ комплексар эцигдай фикир авай, амма Япониядин гьукумди нара­зи­вал къалурна. Хабарар кьунин серенжемда иштиракай агьалий­рин са паюни наразивилин тереф хуьзва. “Новости” РИА-ди хабар­ гузвай­вал, идан гьакъиндай уьлкведа тухванвай ахтармишунри шагьидвалзава.

Хабарар кьунин жуьреда тешкилай ахтармишунра 18 йисалай виниз яшда авай 1270 агьалиди иштиракна. Идалай вилик хабар гайивал, Японияди разисузвал къалурунин себебрикай сад коронавирусдин тIугъвал я. Гьукумдарри ракетайриз акси комплексдихъ галаз алакъалу экономикадин, технический месэлайрин метлебдизни фикир гузва.

США-ди 2023-йисуз Япониядин островра ракетайриз акси оборонадин комплексар эцигунин план гьеле 2017-йисан эхирда малум хьанай.

Ихтибар зайиф жезва

Украинадин президент В. Зеленскийдиз халкьдин патай авай ихтибардин дережа са йисан муддатда агъуз аватна. Идан гьа­къин­дай “Социальный мониторинг” центради тухвай ахтармишунрин делилри шагьидвалзава, кхьизва “Страна.ua” чешмеди.

Хабарар кьунин серенжемдин нетижайрал асаслу яз, Зеленскийдиз тамамвилелди анжах 13 процентди ихтибар ийизва. Уьлкведин кьилиз тамамвилелди ихтибар тийизвайбур кьадар 28,3 процентдикай ибарат я. Амайбур атIай жаваб гуз тежезвайбур, кьве рикIин хьанвайбур я.

Къурху гана

США-дин президент Д.Трампа милли хатасузвилин рекьяй вичин виликан меслятчи Д.Болтон дустагъда ацукьун ва адавай пулдин такьатарни вахчун лазим тирди малумарна. Идакай Трампа вичин Twitter-аккаунтда кхьена.

Трампан фикирдалди, къазанжи къачунин макьсаддалди сирлу информация раижай Болтоназ ихьтин жаза къвезва. Трампа идалай вилик Болтоналай гъил къахчур макъамдин патахъайни гьайиф чIугвазва.

Цавун гьужум

Сириядин Сувейда ва Дейр-эз-Зор вилаятра авиациядин цIийи гьужум кьиле фена, хабар гузва “SANA” агентстводи.

Гьавадай авур гьужумдиз Сириядин ПВО-ди аксивална. Гьужумдин нетижада кьве военный кьена, кьуд касдални хирер хьана. Материалдин жигьетдайни зарар хьана. “South Front” чешмеди тестикьарзавайвал, авиациядин гьужум Израилдин армияди кьилиз акъудна.

«Лезги газет»