Дагъустан Республикадин халкьдин артистка, театрдин пешекар актриса Зарифа Къухмазовадиз юбилей мубаракиз СтIал Сулейманан тIварунихъ галай Лезгийрин госмуздрамтеатрдиз гъилера цуькверни савкьатар аваз адан яратмишунрал рикI алайбур, ярар-дустар кIватI жезвай.
Мярекат театрдин директор Динара Эминовадини кьилин режиссёр Мирзабег Мирзабегова ачухна ва юбилярдин кIвалахдин амай юлдашри тебрикар давамарна.
Дербент шегьердин руководстводин, РД-дин культурадин министерстводин, Театррин деятелрин Союздин патайни Зарифа Къухмазовадин юбилей фикир тагана амукьнач.
РД-дин культурадин министрдин заместитель Мурад Гьажиева Къухмазоврин хизанди Дагъустандин медениятдик чпин яратмишунралди кутунвай пай кьетIенди тирди къейдна. Диде-бубадин рехъ давамарзавай бажарагълу кас, пешекар Зарифа Къухмазова идалай кьулухъни тамашачийрин рикI алай актриса яз амукьдайдакай вичин фикирар лагьана.
Шегьердин округдин кьил Малик Баглиеван патай Тебрикдин чар адан заместитель Мегьти Алиева кIелна.
Зарифа Къухмазовадихъ галаз Тифлисда санал кIелнавай Ярагьмед Ярагьмедова кьиле тухузвай юбилейдин и мярекат театрдин тамашайрай къалурнавай сегьнейри, лезги манийри, кьуьлери, кIелай шиирри мадни гурлу авуна. Тарлан Мамедова, Суьлгьуьят Гьажиевади, Даниял Къазиева, Эльмира Къарахановади, Ашукь Айдуна, Валерий Сулейманова, Замира Гьажиевади, юбилярди вичи ва гзаф масабуру тамамарай манияр тамашачийри гурлу капаралди, цуькверин кIунчIаралди кьабулна.
Юбилярдиз хайи югъ мубаракиз, руьгь кутадай чими тебрикарни рикIел аламукьдай савкьатар гваз театроведар — Заира Ахаева ва Зумруд Селимгереева, Аваррин госмуздрамтеатрдин кьилин режиссёр Алисултан Батыров, “Лезги газетдин” литературадин отделдин редактор Мердали Жалилов, шаир ва меценат Абил Межидов, Кьурагь районда авай Россиядин халкьарин адетдин культурадин центрадин директор Кевсер Фейзуллаева, юбилярдихъ галаз мектебда санал кIелайбур, мукьва-кьилияр, къуни-къуншияр атанвай. Кьиблепатан Дагъустандин бязи районрин кьилери, Дагъустанда кардик квай милли гостеатррин коллективри тебрикдин телер ракъурнавай.
Мярекатдин эхирдай дидедиз хайи югъ юбилярдин пуд руша манияр тамамаруналди мубаракна. Зарифа Къухмазовади вичин пешекарвилин уьмуьрда чIехи роль къугъвай ксарикай маракьлу суьгьбетна, юбилей мубаракиз атай вирибуруз сагърай лагьана.
* * *
Зарифа Лезги театрдин маш-гьур актёрар, РСФСР-дин халкьдин артистар Мурадхан ва Шемси Къухмазоврин хизанда хьана. Сегьнедин пешекарвилин тIебии пай ганвай рушан рикI гьеле мектебда кIелзамай йисара театрдин искусстводал алай. ИкI, вичин ашкъидалди Шота Руставелидин тIварунихъ галай Гуржийрин театральный институтдик экечIай Зарифади гьа йисарилай сегьнеда вичин бажарагъ, пешекарвал къалурзава. Ина ам “Дагъустандин халкьдин артистка” лагьай чIехи гьуьрметдин тIварцIивни агакьна.
Вичин виниз тир пешекарвал ада театрда кIвалахиз эгечIай гьа сифте йикъарилай башламишна къалурна — гьар жуьредин жанрайрин тамашайра жуьреба-жуьре къилихрин кьетIен къаматар арадал гъана: Медеядин (Еврипидан “Медея”), Донна Аннадин (А.Пушкинан “Къванцин мугьман”), Марьяман (Г.Лезгинцеван “Человек с гор”), Гуьлназан (Гь.Гьажибегован “Мешеди Ибад”) ва гзаф масабурун.
Вичин бажарагъдин сирер гила ада театрдиз цIийиз къвезвай жегьилрихъ галаз пайзава, милли театр мадни гужлу хьуниз къуллугъзава.
Чи тебрик
Гьуьрметлу Зарифа Мурадхановна! Чаз вун чи милли театрдин лап кьакьан гъетерин гапIалда чIехи хьайи устад яз чида.
Мурадхан ва Шемси-Къемер хьтин гъетеривай пай агакьнавай ви нурарни чи республикадиз ва адалай къецени машгьур хьанва. Вал “Дагъустан Республикадин лайихлу артистка”, “Дагъустандин халкьдин артистка” — чIехи тIварар атуни ви рехъ адлуди, экуьди, генгди, гележегдани вичел дамахдайди тирди субутзава. Вун гзаф къаматра къугъванва, гзаф сеферра вишералди тамашачийрин патай вуна баркалладин гафар-алхишар къазанмишнава.
Ви вилик генани гзаф крар, метлебар кума. Лезги сегьне вич амай кьван ана Къухмазоврин ирс давам жедайдахъ чна инанмишвалзава. Сагърай вун! Агалкьунар хьурай вахъ!
Гьар са къамат — къаш хьтин,
Шагьдин рушан таж хьтин,
Кьакьанвилиз — арш хьтин,
Жедач маса ярж ахьтин, —
Агь, Зарифа, Зарифа!
ГьикI тийин ви тарифар!
Гагь Тамум, гагь Саяд я,
Айисат я, Дилшад я,
Медея я, Гуьлшад я,
Дагъни аран, гьуьл шад я, —
Агь, Зарифа, Зарифа!
ГьикI тийин ви тарифар!
Ахцегь багъди битмишай,
Бахтуни чаз багъишай,
Цуьк алай тар гьамиша,
Нуьгвед ич я — дадмиша!
Агь, Зарифа, Зарифа!
ГьикI тийин ви тарифар!
Сегьнедилай мердвилив
Хуьзвай Экуьн гъед вилив,
Ингье ква вун къе вилик,
Умуд, экв я кьве вилин,
Лув це, лув це мад вилик!
Агь, Зарифа, Зарифа!
Сагърай ви шад тайифа!..
“Лезги газетдин” редакциядин коллектив
