Алатай гьафтедин эхирра Кьасумхуьрел Дагъустандин халкьдин писатель Абдуселим Исмаилован 70 йисан юбилейдиз талукьарнавай шииратдин межлис кьиле фена. Гафунин устаддиз и лишанлу вакъиа тебрикиз Сулейман-Стальский райондин кьил Нариман Абдулмуталибов, Дагъустандин халкьдин шаир Ханбиче Хаметова, Дагъустандин халкьдин артист, Лезги театрдин кьилин режиссер Мирзебег Мирзебегов, “Лезги газетдин” кьилин редактор Мегьамед Ибрагьимов, философиядин илимрин доктор Салигь Муслимов, “Самур” журналдин жавабдар къуллугъчи Зульфикъар Къафланов, шаирар тир Сажидин, Сардар Абил, Шагьабудин Шабатов, Абидин Камилов ва масабур атанвай.
Вичин рахунра Нариман Абдулмуталибова мярекатдин кьилин игитди лезги литература еримлу хьуник кутунвай пай, адан яратмишунрин кьилин терефар, писателдик къалабулух кутазвай месэлаяр къейдна. Сулейман-Стальский райондин кьили А.Исмаилова лезги драматургиядин хиле чIугвазвай зегьметдикайни лагьана:
— Лезги драматургиядик куьне лайихлу пай кутунва. Сегьнедал эцигзавай куь эсерри инсанрик руьгь, хъсан, мергьяматлу крар ийидай гьевес кутазва, экуь гележегдин умудар гузва. КIелзавайбуруз куь игитар вужар ва гьихьтинбур ятIа чизва, абурувай хъсан ерияр чпиз къачузва… Заз квез кьилди жуван ва вири районэгьлийрин патай юбилей мубаракиз кIанзава. Къуй квехъ чандин сагъвал, яратмишунрин рекье мадни еке агалкьунар хьурай.
Юбилярдиз ада тIварцIин сят, Сулейман-Стальский райондин администрациядин патай Гьуьрметдин грамота ва пулдин пишкеш гана.
Гуьгъуьнлай рахай юлдашрини Абдуселим Исмаилован уьмуьрдин ва яратмишунрин рекьикай ихтилатарна, адаз хас ерияр рикIел хкана.
А.Исмаилова вичин юбилейдиз ихьтин фикир, яратмишунриз къимет гунай шииратдин межлисдин вири иштиракчийриз сагърай лагьана.
Къейд ийин хьи, цIинин йисуз 60 йисан юбилей къейднавай шаир Зульфикъар Къафлановавни мярекатдин сергьятра аваз Сулейман-Стальский райондин администрациядин патай Гьуьрметдин грамота ва пулдин пишкеш вахкана.
Юбиляррив культурадин “Куьредин ярар” центрадин патайни дипломарни ктабар агакьна.
Райондин мектебра кIелзавай аялри Абдуселим Исмаилован шиирар хуралай кIелна, Культурадин кIвалин гьевескарри писателдин чIалариз кхьенвай манияр тамамарна. ГьакIни “ЯркIи чилерин дамах” тIвар алаз Абдуселим Исмаилован яратмишунриз талукьарнавай ктабрин выставкани тешкилнавай.
Агьмед Магьмудов
