15-июндин йифиз Мегьарамдхуьруьн райондин ЛукIварин хуьруьз мукьва мулкарал чпин Ватандиз хъфидай вахт вилив хуьз вахтуналди алачухрик яшамиш жезвай Азербайжандин агьалийринни Дагъустандин къенепатан крарин органрин къуллугъчийрин арада чуьруьк арадал атана.
“Лезги газетдиз” Урусатдин Силисдин комитетдин РД-да авай Управленидин пресс-къуллугъди хабар гайивал, тахминан йифен 9-дан зураз чеб Ватандиз рекье хтунин месэла гьялзавай къайдадал нарази тир Азербайжандин 400-дав агакьна агьалияр, улакьрин гьерекат акъвазарунин макьсаддалди “Кавказ” шегьре рекьел экъечIна. Абурун къайдасузвилерин вилик пад кьаз алахъай полициядин къуллугъчияр наразивал къалурзавай азербайжанвийри са акьван хушдиз кьабулнач: абур къанун-къайда хуьдай органрин къуллугъчийрал къванер ва маса затIар ахъайиз гатIунна.
Нетижада 7 полицейскийдин сагъламвилиз жуьреба-жуьре заланвилин тIарвилер, къуллугъдин 5 улакьдиз хасаратвилер хьана.
16-июндиз Дагъустандин Кьил Владимир Васильев арадал атай чуьруьк веревирд авун патал Мегьарамдхуьруьз фена. Иниз гьакIни Азербайжандай кьиле къунши уьлкведин МВД-дин кьилин заместитель авай махсус делегацияни атанвай.
Мярекатдал РД-дин Гьукуматдин Председателдин заместитель Рамазан Жафарова алай вахтунда Дербент районда Ватандиз хъфин вилив хуьзвай Азербайжандин 600 агьали авайдакай хабар гана. Абур сергьятдилай а патаз рекье хтун кьве уьлкведин арада авай махсус икьрардин бинедаллаз тешкилзава.
“Азербайжандивай чпин агьалияр вири санал кьабулиз жезвач, гьавиляй гьар гьафтеда 100-130 кас рекье хутазва. Гьайиф хьи, ЛукIварин хуьруьн патав туькIуьрнавай алачухрик яшамиш жезвай бязи агьалияр нубатдин гьафтеда вужар Ватандиз хъфидатIа къейднавай сиягьдихъ галаз рази хьанач. Абуру Азербайжандиз хъфин чпи фадлай вилив хуьзвайди яз гьисабна ва шегьре рехъ агализ алахъна. Нетижада чуьруькни арадал атана. Алай вахтунда гьалар къайдадик кухтунва”, — лагьана Рамазан Жафарова.
РД-дин МВД-дин кьил Абдурашид Мегьамедова къейд авурвал, чуьруькдилай кьулухъ Азербайжандин 93 агьали Мегьарамдхуьруьн райондин отделдиз хутахна ва абур Урусатдин къанунар вилив хвена, жавабдарвилиз чIугвада.
Владимир Васильева Азербайжандиз рахкурзавайбурун сиягьар гьахълувилелди туькIуьрунин тапшуругъ гана. Адан гафаралди, накь хтайбурун тIварар сиягьда гьатна, фадлай вилив хуьзвайбурун гьатнач лугьудай ванер-сесер ава. “Ихьтин крарал эхир эцигна кIанда. Чна 360 агьали патал алачухар туькIуьрнава. И крариз еке харжияр акъатзава. Гьа жигьетдай яз, республикадин бюджетдайни”, — лагьана Дагъустандин Кьили.
(Макъала куьруь авуна гузва. Гегьеншдиз РД-дин Кьилин сайтдай кIелиз жеда)
«Лезги газет»
