(Эвел — 23-нумрада)
- Ахьтинбур (мунафикьар) — дуьз рехъ (иман) туна, ягъалмишвал (куфр) къачунвайбур (хкянавайбур) я (абур дуьз рехъ къимет яз гана ягъалмишвал къачурбур я) ва (гьавиляй) абурун алишверишди къазанжи (хийир) гъанач абуруз ва хьанач абур дуьз рекьевайбурни!
- Абурун мисал (загьирда Пайгъамбардихъ иман гъана, ахпа кафирвал авуна чеб зулуматра, ягъалмишвиле, шаклувиле ва умудсузвиле гьатнавай мунафикьрин гьал) вичи (лап мичIи йифиз галайбуруз экв, чимивал хьун патал еке) цIай куькIуьрнавай касдин мисалдиз (гьалдиз) ухшар я. Ва ада (еке цIу) адан (а касдин) кьуд патахъай экуь (ишигълу) авурла, Аллагьди абурун экв вахчуна (цIай хкахьна) ва абур са затIни такваз, зулуматра (мичIивилера) туна (са рехъни жагъин тийиз).
- (Абур, яни мунафикьар) (гьахъдин ван текъвез) бишибур, (гьахъ лугьун тийиз) лалбур (ва гьахъ такваз) буьркьуьбур я ва (гьавиляй) хкведач (абур дуьз рекьихъ)!
- (Мунафикьрин маса дестедин гьал — чпиз гьахъ гагь ачух жезвай ва гагь чеб шаклу хъжезвай, баябан чуьлда рекьевай жемятдин) гьалдиз ухшар я, чпел цавай лап къати марф къвайи, вичени зулуматар (мичIивилер), гугрумар ва цIайлапанар авай. Абуру цавар рахунин къати ванерикай чпин япара тупIар твазва, кьиникьикай игьтиятвализ (гьелек жез кичIез). Гьакъикъатда, Аллагьди кафирар (элкъуьрна) кьунва (чирвилелди ва къудратдалди).
- ЦIайлапанар (чпин къати цIарцIарралди) абурун вилерин экв тухуз мукьвал я; гьар сеферда абуру (къати) экв гайила, абур адакди физва (къекъвезва), ва (къати цIарцIар квахьна) мичIи хьайила, (абур чкадал) акъваз жезва. Эгер Аллагьдиз кIан хьанайтIа, Ада абурун “ван атунин гьисс” ва “вилериз акунрин гьисс” вахчудай (амма абуруз муьгьлет хганай). Гьакъикъатда, Аллагь гьар са кардал къудратлу я (вири крар алакьда)!
- Эй, инсанар! Ибадат ая (куьне) куь Раббидиз — Вичи, куьн халкьнавай ва квелай вилик хьайибурни, квез (Аллагьдикай) кичIе хьун патал!
- (Ибадат ая Раббидиз) Вичи квез чил мес хьиз авунвай (Ада куьн патал чил экIянава куь яшайиш анал регьят хьун патал) ва цав — дарамат яз авунвай (Ада цав къав яз эцигнава), ва цавай (Ада) яд авуднава, ва адалди (чиляй) емишар акъуднава (экъечIдайвал авунва) квез рузи яз, (гьавиляй куьне Аллагьдиз садни барабар ийимир ва) кьамир абур барабарбур (ухшарбур) яз Адаз (шерикар гъимир куьне Адаз — ибадат авунин карда), квез чиз-чиз (Адаз барабарди, ухшарди авачирди, ва халкь авун, ризкьи гун са Адаз талукь тирди)!
- Ва эгер куьн Чна Чи лукIраз (авудна) ракъурнавайдан (Къуръандин) патахъай шаклувиле аватIа, (бес), гъваш куьне са сура (кьванни) ам хьтин (Къуръанда авай сурайриз ухшар), ва эвера (куьне) куь куьмекчийризни (ва гъуцаризни) Аллагьдилай гъейри, эгер куьн гьахъбур ятIа.
- Ва эгер куьне тавуртIа а кар (яни тагъайтIа сура) ва квевай ам гьич ийизни жедач, кичIе хьухь квез ЦIукай, вичин кудай затI инсанар ва къванер тир, кафирриз гьазурнавай.
- Ва шад хабар це (вуна, эй Пайгъамбар) чпи иман гъана диндар крар авурбуруз — гьакъикъатда, абуруз Женнетар жеда, чпин (Женнетда авай зурба кIвалерин ва чIехи тарарин) агъадихъай вацIар авахьзавай. Гьар сеферда (Аллагьди) абуруз анавай емишрикай пай (нямет) гайила къунагълух яз, абуру лугьуда: “Им — чаз гьа виликдай гайи пай хьтинди я” ва абуруз гудайди сад-садаз ухшарди жеда (шикилдиз, амма тIеамдиз мадни хъсанди жеда). Ва абуруз анра (чеб “вацракьилерикай”, чиркинвилерикай, пис къилихрикай) михьи тир папар жеда, ва абур ана даим яз амукьда.
- Гьакъикъатда, Аллагьдиз регъуьзвач (гьахъдикай ва регъуьзвач) мисал яз гъиз мичек ва адалайни артух шей (ва я адалайни усал шей — къалурун патал мушрикриз абуру Аллагьдилай гъейри ибадатзавай вири гъуцар михьиз ажиз тирди). Ва эгер иман гъанвайбур лагьайтIа, абуруз чизва, гьакъикъатда, ам чпин Раббидин патай гьахъ (гьакъикъат) тирди. Ва эгер кафирвал авурбур лагьайтIа, абуру лугьузва (ягьанатариз): “Аллагьдиз вуч лугьуз кIан хьанва жал и мисал гъана?!” (Къуй абуруз чир хьурай) Адалди Ада гзафбур ягъалмишвиле твазва ва гзафбуруз Ада адалди дуьз рехъ къалурзава. Ва ягъалмишвиле твазва Ада адалди анжах фасикьар (асибур, Аллагьдиз муьтIуьгъсузбур).
- Чпи Аллагьдин агьт (Ада абурувай къачунвай икьрар) чIурзавай ам “кутIунна мягькемарнавайдалай” кьулухъ, ва (чпи), Аллагьди (чпиз) алакъалу авун (кукIурна, кьатI тавуна хуьн) эмирнавай кар (месела, мукьва-кьиливилин алакъаяр) кьатIзавай (атIузвай), ва (чпи) чилел чIурувилерни чукIурзавай. Ахьтинбур гьабур я зиянвал (еке зарар) жедайбур (и дуьньядани ва Эхиратдани)!
- ГьикI куьне (эй, мушрикар) Аллагьдихъ кафирвалзава, куьн чансузбур тир ва Ада квел чан гъанвайла?! Ахпа (куь ажал атайла) Ада куь чан вахчуда, ахпа (Ада) квел чан хкида (Къияматдин Юкъуз) ахпани куьн Адан патав (элкъуьрна) хкида (гьахъ-гьисабдиз).
- (Са) Ам я Вичи куьн патал чилел алай вири шейэр (куьне ишлемишзавай вири няметар) халкьнавайди, ахпа Ада къастна (ниятна) цаварин кардихъ (башламишна абур халкьун) ва Ада абур ирид цавар дуьзарна. Ва Адаз гьар са шей (вири шейэр) чизва!
30.Ва (рикIел гъваш вуна инсанрин — эй, Пайгъамбар) ви Раббиди малаикриз лагьай вахт: “Гьакъикъатда, За чилел халиф ийида (чил Аллагьдин мурад тирвал кардик кутадай, чебни са несилар муькуь несилрин чкадал къвез, кар давамардайбур, яни инсанар халкьда)”. Абуру лагьана: “(Я Рабби, чира чаз вуч патал Вуна абур халкьзаватIа, бес) Вуна ана чпи анал чIурувилер чукIурдай ва (ягъиз рекьиз) ивияр экъичдайбур ийидани, вични, чна тасбигьзавайла (чIехивал ва гьайбатлувал са Ваз талукьарзавайла) Ваз гьамд гъиз ва чна Вун пак ийизвайла?!”. Ада лагьана: “Гьакъикъатда, Заз квез чин тийизвай крар чизва!”.
- Ва чирна Ада Адамаз вири (шейэрин) тIварар, ахпа Ада абур (а тIварар алай шейэр) малаикриз теклифна (къалурна), ва лагьана: “Хабар це (лагь) кван куьне Заз ибурун тIварар, эгер куьн гьахъбур ятIа”.
- Абуру (малаикри) лагьана: “Пак я Вун! Авач чаз чирвал Вуна чаз чирайдалай гъейри. Гьакъикъатда, Вун — Вири Чизвайди, Лап Камаллуди я!”.
(КьатI ама)
Таржума авурди — Ямин Мегьамедов
