И мукьвара Сулейман-Стальский райондин кьил Нариман Абдулмутали­бова Агъа СтIалар, Герейханован, Эмин­хуьр ва ДаркIуш-Къазмаяр хуьрерин мулкарал гъиле кьунвай яшайишдин метлеб авай объектрал эцигунринни ремонтдин кIвалахар кьиле тухузвай тегьер ахтармишна.

Сифтени-сифте райондин кьили ДаркIуш-Къазмайрин кьве куьчеда къир цунин кIвалах гьикI тамамарнаватIа ахтармишна. Къейд ийин, и рекьер “Зи Да­гъустан — зи рекьер” проектдин сергьятра авазремонтнава.

Къир цанвай рекьин санлай къачур майдан 2532 кв.метрдиз барабар я, кIвалахар пудратдин кархана тир “Прог­ресс” ООО-ди кьиле тухвана. Ина райондин кьили  заказчикди бес кьадар гуьз­чивал тавурди къейдна. Хуьруьн адми­нистрациядал ва УКС-дал, пудратчидихъ галаз санал, рехъ ганвай нукьсанар­ санал арадай акъудун тапшурмишна.

Гуьгъуьнлай Н.Абдулмуталибов спортдин 2 майдан туькIуьрунин ва жемятди ишлемишзавай чкаяр аваданламишунин кIвалахар кьиле тухузвай Эмин­хуьруьз  мугьман хьана. Алай вахтунда ина спортдин майданар  жугъундалди агалзава. Ина тIебии тушир векь цанвай  футбол къугъвадай чка ва чиле резиндин  материал экIянавай волейболдин майдан туькIуьрдайвал я. ГьакI­ни жемятди ял ядай парк кутада, экверин даяхар тайинарда.

И кIвалахар  государстводин “Хуьрерин чкаяр бинедилай туькIуьрун” программадин сергьятра аваз ва бюджетдилай къерехдай тир такьатарни желб авуна, кьиле тухузва.

Хуьруьн  юкьвай физвай Э.Салигьо­ван тIварунихъ галай куьчеда сквер туь­кIуьрунин кIвалахарни кьиле тухузва. Алай вахтунда ина  чиле бетондин плитка твазва ва чилин кIаникай тухузвай электропроводка ва цин турбаяр тайинарзава. Ина аялар къугъвадай майдан  туькIуьрун, куьсрияр ва абурун патав зирзибил вегьедай къапар эцигун, эквер гъун  пландик кутунва.

И проект республикадин “Шегьердин къулай шартIар” программадин сергьятра­ аваз кьилиз акъудзава. КIвалахрин санлай къачур къиметди 3 082 708 манат­ теш­килзава. Нариман Абдулмуталибова хуьруьн администрациядин кьилиз ва УКС-диз объектрал тамамарзавай кIва­­лахрин ери гьар юкъуз ахтармишун, гьакI­ни Ватан­дин ЧIехи дяведин иштиракчийриз эцигнавай памятникдин патав гвай чкаяр къайдадиз хкунин тапшуругъар ганва.

Райондин кьил мугьман хьайи мад са объект Герейханован хуьруьн 1-отделенида ава. Ина республикадин “Ше­гьер­­­дин къулай шартIар” программадин сергьятра аваз жемятди ял ядай чка аваданламишунин кIвалахар кьиле тухузва. КIвалахрин санлай къачур къимет 3 188 691 манатдиз барабар я. Проектдин бинедаллаз, ина чиле бетондин плитка тун, жугъун дегишарун, чиле хъуьтуьл материал экIянавай аялар къугъвадай майдан туькIуьрун, куьсрияр эцигун, эквер  гъун  планламишнава.

Агъа СтIалрин хуьре государстводин “Хуьрерин чкаяр бинедилай туькIуь­рун” программадин сергьятра аваз алай аямдин 3 мертебадин ва 400 аялдивай кIелиз жедай мектеб эцигиз башламишзава. Объектдиз талукь яз 400 миллион манатдиз барабар тир проектдинни сметадин  документация туькIуьрнава. Меценат Салман Бабаеваз ам тахминан  5 миллион манатдай акъвазна. Мектебдин дарамат эцигун патал хуьруьн юкьва 22047,5 кв.метр чил чара авунва. Район­дин кьили эцигунрин кIвалахар гъиле кьаз гьазур хьанвай майдан ахтармишна­.

Эхирдай Нариман Абдулмуталибова Агъа СтIалрин хуьре авай аскервилин баркаллувилин обелискдин патав гвай чкаяр аваданламишзавай тегьер  ­ахтармишна. РикIел хкин, Сулейман-Стальский райондин тамашуниз лайих асул чкайрикай сад тир обелискдал кIва­ла­хар  “Шегьердин къулай шартIар”  прог­раммадин сергьятра аваз кьиле тухузва.­

Алай вахтунда объектдал жугъун дегишарнава ва чиле бетондин плитка тунин кIвалахар кьиле физва.

Амина  Муслимова