Алай йисуз Махачкъалада Урусатдин Игит Зейнудин Батманован уьмуьрдикай ва ­кьегьалвиликай кхьенвай ктаб чапдай акъат­­да. Идакай “Лезги газетдиз” Кеферпатан Кав­каздин Исламдин ахтармишунрин центрадин директор Руслан Гереева хабар гана.

Р.Герееван гафаралди, лезги халкьдин кье­гьал хцин игитвиликай вири уьлкведиз хабар хьанва. Къанлуйрин вилик Зейнудин Батманова къалурай викIегьвал акьалтзавай неси­лар патал ватанпересвилин чешмедиз элкъвенва.

Къейд ийин хьи, “Зейнудин Батманов — Россиядин Федерациядин Игит” ктаб чапдиз РД-дин милли сиясатдин ва динрин крарин рекьяй министерстводин куьмекдалди Кеферпатан Кавказдин Исламдин ахтармишунрин центради гьазурзава.

“ЦIийи ктабда адетдин инсандин, жергедин дагъустанвидин, хъсан, къени, гьамиша куьмек гуз гьазур дустунин, кьуд аялдин бубадин кьисметдикай ихтилатзава. Ярар-дуст­ари, санал кIвалахай юлдашри, мукьва-кьилийри, хуьруьнвийри Зейнудин Батманов дирибаш, акьалтIай къени къилихар авай инсан яз рикIел хкизва”, — лугьузва ктабдин автор Руслан Гереева.

Игитдикай кхьенвай ктаб чапдай акъудун Зейнудин Батманован экуь къамат халкьди рикIера хуьзвайди къалурзавай ли­шанрикай сад я. Адакай мектебда кIелза­вай­ аялривай, студентривай, аспирантривай, муаллимривай, акьалтзавай несилдиз ватанпересвилин, инсанпересвилин тербия гу­нин месэлайрал машгъул жезвай идарайри­вай менфят къачуз жеда. Ктабда шикилар­, ар­хивриз талукь до­кументар, сиясатдинни же­миятдин векилри, депутатри, министрри, районрин, шегьер­рин кьилери Зейнудин Бат­­мановакай лагьан­вай фикирар, рикIел хкунар гьатда.

Агьмед  Магьмудов