31-майдиз  “Вад лагьай  каналдин”  (“Пятый канал”) сайтда онлайн  къайдада­ ки­нодин ва телевиденидин продюсеррин ­Ассоциациядин (АПКиТ) VIII премиядин ­ла­уреатрин тIварар кьуна. Алай йисуз­  пре­­­­миядин  22  номинациядин  арада  кIвен­кIве­чи чкадал “ТIугъвал” (“Эпидемия”) сериал акъатна.

Шад жедай кар ам я хьи, проектда “Грим ягъунай виридалайни хъсан суьретчи” номинацияда иштиракайбурун арада 1-чка чи ватанэгьлиди — Дербентдай тир (адан бинеяр Ахцегьрин хуьряй я)  Элина  Къарахановади  кьуна.

Элина 1987-йисуз Дербентда дидедиз хьана. Шегьердин 3-нумрадин юкьван мектеб акьалтIарайдалай кьулухъ сифте Дербентдин художественный школада, гуьгъуьн­лай ДГПУ-дин художественно-графический факультетда чирвилер къачуна. 2011-2012-йисара Элинади кIелунар Москвадин “Ос­танкинодин” патав гвай телевиденидин ва ­радиовещанидин  институтда давамарна ва “Грим ягъунай суьретчи” пешекарвал къа­чуна.

Гьа и курсар акьалтIарайдалай кьулухъ ала­кьунар авай лезги руша вичин уьмуьр кинематографиядихъ ва телевиденидихъ галаз алакъалу авуна.

Вичин асул пешедай кIвалахзавай йисара рангарин сирер чидай Элинади кинодин 25 суьретдин винел зегьмет чIугуна. Кьилди къачуртIа, абурун арада “Крымдин тIатIи­лар”, “Къванцин кIачIичIлухрин къанунар-2”, “Рушар гьар жуьрединбур жеда”, “Мурк-2”, “ТIугъвал” ва масабур ава. Телевиденидикай ра-хайтIа, бажарагълу руша “Кьуьлер”, “Ксудач”, “Къуй лугьурай” ва маса программайрин винел кIвалахна.

Суьретчи-гримёр тир Элина Къарахановади са гъвечIи девирда уьлкведин кинематографиядин ва телевиденидин алемда вичиз гьуьрмет къазанмишна. И рекье адаз, сифте нубатда, алакьунри, къастунал кIеви-ви­ли, сабурди, дурумлувили ва маса ерийри куьмекна.

АПКиТ-дин премия къачун регьят крарикай туш. Анжах Элинадилай и кар алакьна. Гъалибчидиз оптикадин гуьзгуьдикай, къванцикай ва нур гудайвал цIалцIамарнавай буьруьнждикай раснавай кьве килограммдин заланвал авай статуэтка гана.

Лезги театрдин ва “Лезги газетдин” ре­дакциядин коллективри Элина Къарахановадиз яратмишунрин рекье къазанмишнавай чIехи агалкьун рикIин сидкьидай мубарак­зава. Къуй чи бажарагълу рушахъ кине­ма­тогра­фиядин ва телевиденидин алемда мадни еке кукIушар муьтIуьгъардай мумкинвилер хьурай!

Эминат  Загьирбекова