Зур миллиондив агакьзава

Чи уьлкведа коронавирус акатнавайбурун кьадар зур миллиондив агакьзава. Идан гьакъиндай 10-июндиз оперативный штабди малумарна, хабар гузва “Новости” РИА-ди.

ТIугъвал пайда хьайи вири муддатда Россияда 493 657 касдик коронавирус акатна. Начагъ хьайи 252 783 кас сагъар хъувунва, 6358 —  кьенва.

10-июндиз Россиядин 85 регионда 8404 касдик коронавирус акатна. И йикъан делилралди, дуьньяда коронавирус акатнавайбурун кьадар 7 241 001-дав агакьнава, 3 373 832 — сагъ хъхьанва, 411 320 —  кьенва.

Греция гьазур хьанва

Грециядиз Туьркиядихъ галаз дяве ийиз кIанзавач, амма къал-къиждин вакъиаяр арадал атуниз гьазурвал акунва. Идакай грекрин милли оборонадин министр Н. Панайотопулоса малумарна, хабар гузва “Новости” РИА-ди.

Адан фикирдалди, Туьркияди эхиримжи вахтара гьужум ийиз кIанзавай тегьерда тухузва. Министрди къейд авурвал, вижевай къайдада жаваб гун патал Грецияди са рехъ арадал гъун, яракьлу къуватрин мумкинвилер гегьеншарун лазим я.

Идалай вилик Туьркияди Грециядин островрин мукьув гвай мулкарай углеводород хкудунин патахъай лицензия къачунин арза чапнай. Адалай кьулухъ Грециядин МИД-дин кьил Н.Дендиа­са Туьркиядин терефдиз и жуьреда чара уьлкведин аслу туширвилин ихтиярар чпиз къачуз кIанзавайдакай наразивилелди малумарнай.

Вири сергьятар алудна

Новая Зеландияди коронавирус себеб яз кардик кутур сергьят эцигай вири серенжемар къуватдай вегьенва. Идакай уьлкведин премьер-министр Д.Ардерна ихтилатна, хабар гузвай “The Sydney Morning HeraId” чешмеди.

ИкI, Новая Зеландия дуьньяда коронавирусдин азар чукIунихъ галаз алакъалу яз кьабулнавай серенжемар михьиз амал аламачирбур яз малумарай сад лагьай уьлкве я. Алава хъийизвайвал, анжах къецепатан уьлквейрин ватандашриз уьлкведиз гьахьдай ихтиярар авач. Гьукуматдин кьиле авайбурун фикирдалди, абурулай коронавирусдин вилик пад кьаз алакьна. Вирусди начагъ авур эхиримжи ватандаш 8-июндиз сагъар хъувуна. Эхиримжи 18 юкъуз и уьлкведа садакни коронавирус акатнавач.

Къадагъаяр кIанзавач

Украинадин медениятдинни информациядин сиясатдин цIийи министр А.Ткаченкодин фикирдалди, уьлкведиз къведай ихтиярар­ авачир Россиядин актерар квай фильмаяр Украинада къалурунал­ къадагъа эцигун дуьз туш. Идакай “Лента.ру” чешмеди хаб­ар гузва­.

“Са низ ятIа чи уьлкведиз гьахьдай ихтияр тагунин делил ­ахьтин ксарин иштираквал авай фильмаяр къадагъа авунин себебриз элкъуьрна виже къведач”, — лагьана цIийи министрди.

Белоруссиядин истемишун

Белоруссияди Россиядивай газдин къимет ужузарун истемиш­зава. А уьлкведин энергетикадин министерстводин гафар “ТАСС” чешмеди раижна.

Къейдзавайвал, Белоруссиядин терефди нубатдин сеферда чпин уьлкве патал газдин къиметдиз мад сеферда килиг хъувун ва адалатлу дережадиз акъудун чарасуз яз гьисабзава.

Россиядин газдин къиметдин патахъай Москвадинни Минскдин арада йисан эвел кьилерилай са шумудра веревирдер кьиле фена. Июндин сифте кьиле “Газпромдин” кьил А.Миллера газдин къимет дегишаруниз талукь рахунар анжах къведай йисуз гатIунда лагьана. А чIавалди лагьайтIа, авай шартIар кардик кумукьда.

Нурмегьамедов — Гэтжи

Кьезил заланвиляй UАС-дин тешкилатдин чемпион Гьабиб Нурмегьамедованни америкави Жастин Гэтжидин арада 19-сентя­брдиз бягьс кьиле тухуз кIанзава. Идакай “ТАСС” чешмеди хабар гана.

Чемпиондин чIул патал кьиле фидай бягьс UАС-дин руководстводиз тешкилатдин 253-нумрадин турнирдин сергьятра аваз кьиле тухуз кIанзава. Бягьс сентябрдиз кьиле фидайдакай тешкилатдин кьил Д.Уайта идалай вилик малумарнай. Бягьс кьиле фидай чка гьелелиг тайинарнавач.

Америкави Гэтжи 22 сеферда гъалиб хьанва, 2 сеферда кумукьнава. Нурмегьамедов садрани кумукьнавач, кьиле тухвай 28 бягьсина ам гъалиб хьанва.

ЦицIерин гьужум

Къиргъизиядин хуьруьн майишатдин министерстводи жемят цицIерин гьужум арадал атуникай тагькимарна. Идакай “Лента.ру” чешмеди кхьизва.

Министерстводи цицIер гегьеншдиз чукIун коронавирусдин тIугъвалдихъ галаз алакъалу ийизва. “Им аламатдин кар я. Чна ахтармишунар кьиле тухвана. Малум хьайивал, инсаният четинви­лера гьатайла (дяве, тIугъвал, кризис себеб яз), цицIерин активвал­ артух жезва”, — малумарна министерстводин векил А.Алакунова.

Виликамаз малумарнавай делилралди, Къиргъизиядин 120 гектар майданра цицIери агъавалда. Абурун гьужумди уьлкведин экономикадиз бегьем зарар гуда.

«Лезги газет»