РикIелай алуддач…
(Гъалибвилин 75 йис тамам хьуниз)
ХъуьтIуьн къаяр яргъа хьана,
Атана чаз гуьзел гатфар!
Гъана вичин луварик кваз
Гъалибвилин багьа сувар!
Гьар са хуьре, гьар са кIвале,
РикIел хкин четин вахтар.
Чи бубайри чанар ганай,
РикIел хкин гьабрун тIварар.
Чан алай полк гегьенш ийин,
Шикилар гваз экъечIин.
Рекьин тийир полкуник чун
ЧIехид, гъвечIид экечIин.
Дяведин цIай галукь тавур,
Са тухумни амач хьи.
А жаллатIри бязи хуьрер
Картада гьич тунач хьи.
Куь сурара нур аваз хьуй,
Халкьдин багъри инсанар!
Гьар сад квекай игитар я,
Чи патай квез гьуьрметар!
КIуьд лагьай Май, вахъ гаф авач,
Дяве чалай алудай.
Къаних фашист инсаф квачир,
Чи Ватандай акъудай!
ЦIийи кIвализ
Чи играми Сулейманан утагъар,
Мад мугьман яз чун куь патав атана.
Дегишвилер, ачухвилер акуна,
Гуьгьуьл тухдал марифатдив ацIана.
КичIезвай заз кIвалихъ галай берекат
ЦIу тухвана куьтягь хьана амукьиз.
КIвал амачиз Сулейманан атай руьгь
Куьчедаллай хатрут тарцик ацукьиз.
А гьаятдин юкьвал алай лежбердин
ЧIехи бармак чиниз ават хьуникай.
Гьайиф тир заз а тарихдин шагьид жез,
РикI сефил яз зун патавай финикай.
Шукур Аллагь, ава хьи чахъ рухваяр,
Сад Аллагьди рехъ гурай квез, багърияр.
Керимовни Сардароврин кьегьалар
Имам стха, амай вири амлеяр.
Сада шалам, сада чуьнгуьр жагъурна,
Багьа кIвалел чан хкана дустари.
Герек къвезвай къаб — къажахни жагъурна,
Муьгьтеж тунач рикIер михьи устадри.
Гила вири илиф цIийи макандиз,
Дамахдивди килиг гуьзел ватандиз,
Яран сувар кьиле тухур йикъариз,
Тавакъу я, хъфин тийин ахвариз.
«Лезги газетдин» 2020-йисан 23-нумрадай
_________________________________________________________________
Лезгидиз
Зи играми лезги вахар, стхаяр,
Кьисметри куьн гьар патарихъ акъудна.
Урусатдин руьгь акатна чанарик,
Са бязибур чIалавайни къакъудна.
Лезги чIалахъ еке мана авайд я,
Сагъламвални гуда ада квез, бахтни.
Зегьмет чIугу, хизанни хуьх викIегьдиз,
Чи чIал чирдай жагъур куьне са вахтни.
“Лезги газет” чи къуватрин гьевес я,
Лувар кутаз гьар са касдик кIвалахдай.
Дидедин чIал чи виридан дамах я,
Чи далудихъ акал хьанвай са дагъ я.
“Лезги газет” кхьин чна вирида,
Фадлай я ам гьакьван кIани чи мугьман.
Эминанни Сулейманан чIаларал
Зи лезги халкь гьамишалугъ я гьейран.
“Лезги газет” кхьин ирсдин буржи я,
Чи гьар садан кIвале ам лап герек я.
“Лезги газет” авачир кIвал ичIи я,
Гзафбуруз ам руьгьдин ем, куьмек я.
«Лезги газетдин» 2020-йисан 25-нумрадай
_________________________________________________________________________________________________________
Лезги чlалал рахазва
Цуькверивди безетмиш я векьин чил,
Вил вегьейла вилин ишигъ тухузва.
Мукьув фена атIуз темягь хьайила,
Захъ элкъвена лезги чIалал рахазва.
И тIебиат: дагълар, тамар, чуьллерни,
Чиле авай мулдин цуьквер, гъвергъверни,
Векьер-кьалар, гьатта экуьн сегьерни,
Захъ элкъвена лезги чIалал рахазва.
Каспи гьуьлел алай чIехи лепеяр,
Чи дагъларин кьакьан, дерин тепеяр,
Лезги тарих туькIуьр авур бинеяр
Захъ элкъвена лезги чIалал рахазва.
Цавун бушлух кIуьруьрзавай лекьерни,
Такабурлу чи дагъларин синерни,
Мани ягъиз гьазур хьанвай нуькIерни
Захъ элкъвена лезги чIалал рахазва.
Бес тIебиат лезги чIалал атайла,
РикIе авай хуш хиялар лагьайла,
Бинедилай лезгидин тIвар алай
Лезги чIалал рахун тавун дуьз яни?
«Лезги газетдин» 2020-йисан 44-нумрадай
