Вахаз
ТIвар я ви цуькведиз ухшар,
Гъиле авай иер къашар,
Мадни яргъи хьуй ви яшар,
Зи играми, масан вах!
Экуь къастар ава рикIе,
Вун эдебдин язва чешне,
Зун патал ви тIвар я вине
Зи играми, масан вах!
КIвалин абур, дамах я вун,
РикIин сабур, даях я вун,
Са дагъ я вун, са багъ я вун,
Зи играми, масан вах!
«Лезги газетдин» 2020-йисан 23-нумрадай.
________________________________________________________________
Вине хьурай инсанвал
Фана дуьнья! Къвез хъфизва инсанар.
Са касдиз — гьахъ, садаз батIул масан я.
Вуч кIандатIа хкягъ ая, мугьманар!
Амма гьахъвал хкягъайдаз хъсан я.
Къуй дуьньяда гзаф хьурай хъсанвал!
Вине хьурай гьахълувални инсанвал!
«Лезги газетдин» 2020-йисан 42-нумрадай
______________________________________________________________
Балаяр
Гьар са диде-бубад мурад
Бахтлу хьун я балаяр.
КIанда даим хьана лап шад
Чпин рушар, рухваяр.
Балаяр я вилин эквер,
Диде-бубад дамах я.
Экуь хьурай къуй куь рекьер,
Пакад йикъан даях я.
Балайрини гьич рикIелай
Диде-буба алуд тавуй.
Ширин гафар луз мецелай,
Чпин ашкъи агуд авуй.
«Лезги газетдин» 2021-йисан 16-нумрадай
____________________________________________________________
Хайи чIал
Хайи чIал чи дамах я,
Ам миллетдин даях я.
Заз ам пара масан я,
Ам зи рикIин аман я.
Зи ватандин девлет я,
РикIиз чими суьгьбет я,
Заз кIани тир хайи чIал,
Кьисметди заз гайи чIал.
Гьар лезгидиз вине я,
Чи миллетдин бине я,
Зи азиз чIал, масанди,
Вун зи халкьдин къеле я!
«Лезги газетдин» 2021-йисан 25-нумрадай
________________________________________________
Хтулдиз
РикIиз чими аял я,
Вич са гъвечIи марал я,
Аламатдин хиял я
Гьакьван кIани хтул зи.
Ухшар я ам цуькведиз,
Амалриз я къемеди,
Бубадизни дидедиз
Гьакьван багьа хтул зи.
Ам шадвилин чешме я,
Берекатдин бине я,
Лезги чилин бике я
Гьакьван кIани хтул зи.
Сабур
Сабурлу хьухь, эй инсан,
Чир хьухь, сабур дарман я.
Руьгьдин хирер сагъардай
Дава я ам, лукьман я.
Гьар са карда сабур хуьн,
Эмир я ам Аллагьдин.
Амал ая и кардал,
Рехъ гуз тахьуй гунагьдиз.
Сабурлувал дамах я,
Къадир чидай инсандиз.
Ам даях я, пайдах я,
Ери я хас виждандиз.
«Лезги газетдин» 2021-йисан 35-нумрадай
_________________________________________
Хиялар
Дагъви я зун, тIвар я Жамил,
Шадвилерал ала зи вил.
Гагь-гагь серин жезва гуьгьуьл,
ЯтIани за агъуздач кьил.
Кьисмет хьанва заз залан мес,
РикI цIразва, куьмек тежез.
ЯтIан рикIе ава гьевеc,
Асивализ элкъвезвач мез.
Шиирдикай хьанва юлдаш,
Курвилер зи жезва кармаш,
ЖезвачтIани кIвачер муьтIуьгъ,
ТIимил жезвач рикIин ишигъ.
ХьайитIани артух яшар,
КIубан руьгьда жеда гатфар.
Чи гьар са югъ хьурай экуь,
Ислягь хьурай дуьнья вири!
«Лезги газетдин» 2022-йисан 15-нумрадай
__________________________________
Стхадиз
Стха, ви тIвар я чаз вине,
Вуна твазва чун дуьз рекье,
Гьар са карда хьурай кIвенкIве
Вун, чи кIвалин дестек стха.
Вун уьмуьрда я зи даях,
Ийизва за валди дамах,
На чирна заз дуьзди-патахъ
Гьар са карда герек, стха.
Берекатар хьуй вахъ пара,
Вун завай гьич тахьуй чара,
Мадни мягькем хьуй чи ара,
Гьар къадамда панагь, стха.
Стха хьтин авач девлет,
Адаз гьихьтин гуда къимет?!
Зи патай ваз даим гьуьрмет
Авайди я, масан стха.
Кьилиз фирай гьар са хиял,
Вун чи дамах, вун чи кьегьал,
Вун садрани тахьуй бейгьал,
Гьакьван кIани, багьа, стха!
«Лезги газетдин» 2022-йисан 23-нумрадай.
_________________________________________________
Жуван халкьдиз
Заз хайи халкь гзаф кIанда,
Алахъда зун кхьиз шиир.
Абадвал хьуй зи Ватанда,
Эллеризни хьурай хийир.
ГьакIни кIанда заз жуван чIал,
Лезги чIал зи хайи чIал я.
Агакьарна бубайри чал,
Асирралди хвейи чIал я.
КIанда заз зи багъри муг, кьеб —
Лезги чилин гьар са ккIал.
Пакдиз хуьзвай намус, эдеб —
Зи лезги халкь — рикIин хиял.
Сагърай зи халкь, сагърай зи чIал,
Йикъалай-къуз хъсан яз гьал!
Къуй зи халкьдихъ берекат хьуй,
Хъсан карда гьерекат хьуй!
«Лезги газетдин» 2022-йисан 30-нумрадай.
___________________________________________
Гатфар
Алукьнава гуьзер гатфар,
Уях хьанва гила халкьар,
Гьарда вичин кIвалахзава,
Зегьмет чIугваз, дамахзава.
Япарава къушарин ван,
Чпин гьални я лап кIубан,
Ажеб гуьзел вахт я гатфар,
Зегьметкешрин бахт я гатфар!
Дустар
Сагърай зи дустар,
Заз пара кIани.
Къуй экуь къастар
Акъатрай кьилиз.
Дуствални садвал
Чахъ аваз хьурай!
ГьакIни абадвал
Чахъ галаз хьурай!
Дустар, зи дустар,
Шад хьурай рикIер,
Гуьгьуьлда — гатфар,
Рекье хьуй эквер.
«Лезги газетдин» 2023-йисан 18-нумрадай.
________________________________________________
Вахтар
Акваз-такваз физва вахтар,
Артух жезва ингье яшар,
Къуй виридаз гурай бахтар,
Сагъламвални шадвал хьурай!
Багъриярни азиз дустар,
Гзаф хьурай квехъ шад крар,
Ван жез анжах хъсан хабар,
КIубанвални садвал хьурай!
Вахтар я ман, алатна физ,
Тарихда чи гелер тазвай.
Вахт дарман я канвай рикIиз,
Аламатдин къуват авай.
Гьар легьзеди, гьар вахтуни
Чаз шадвални берекат гуй!
Рехъ гегьенш хьуй чи бахтуниз,
Гьар са кардик гьерекат хьуй!
«Лезги газетдин» 2023-йисан 28-нумрадай
_______________________________________
Мугьмандиз
Салам гана, къведа кIвализ,
Чи гуьгьуьлар шадар ийиз,
Чими я вун гьакьван рикIиз,
Берекат я кIвалин мугьман.
Чахъ, дагъвийрихъ, ава адет,
Мугьмандиз ийидай гьуьрмет,
Ваз Аллагьди гурай нуьсрет.
Гьар са карда, азиз мугьман.
Даим мугьман авай кIвале
Кими жедач хатур зерре,
Хушбахтвилин я вун бине,
Гьакьван кIани рикIиз мугьман.
Вун садрани тахьуй сефил,
Даим шад яз хьурай гуьгьуьл,
Гьуьрметдивди кьазвай чи гъил
Вун Аллагьди хуьрай, мугьман.
«Лезги газетдин» 2023-йисан 38-нумрадай
___________________________
Муаллим
Тербиячи — гьуьрмет авай
Муаллим я къе!
Руьгьдин чIехи девлет авай,
Хуьзвай ам рикIе.
Несил чIехи авун патал
ЧIугвазва зегьмет.
Чириз хъсан, къени амал,
Эдебни туьгьмет!
Муаллимдин тариф ая —
Саваддин чешме!
Агъзурралди сухтайриз ам
Я чIехи чешне.
«Лезги газетдин» 2024-йисан 12-нумрадай
