Кредитрин жигьетдай каникулар къачун патал документар кIватIун, госкъуллугърин порталдин куьмек себеб яз, гила асант хьанва, хабар гузва Милли банкунин РД-да авай отделенидин пресс-къуллугъди.
Чешмеди хабар гузвайвал, Россиядин Банкунихъ галаз Минкомсвязди агьалийриз чпикай делилар банкунив ва страхованидин компанийрив госкъуллугърин порталдин куьмекдалди агакьардай мумкинвал гузвай сервис кардик кутунва.
Вахтуналди яз кьабулнавай и къарар коронавирусдин тIугъвалдин вахт алатдалди къуватда жеда. Ида агьалийриз алакъаяр тIимилардай, вахт кьенятдай, кредитдин тешкилатриз лагьайтIа — электронный къул алай документар фад кьабулдай ва кредитдиз талукь яз вахт гежел вегьинин гьакъиндай къарар кьабулдай мумкинвал гуда.
Инал ихтилат Госкъуллугърин порталдин куьмекдалди “кредитдин каникулар” къачуникай ваъ, финансрин тешкилатрив вахт гежел вегьинин гьакъиндай арза гун патал лазим документар агакьарунин мумкинвиликай физва, гъавурда твазва Отделенидин регионда авай пресс-къуллугъди.
Ихьтин къуллугъдикай уьлкведин Госкъуллугърин порталда регистрация авунвай вири агьалийривай менфят къачуз жеда. Гила 2-НДФЛ кIалубда аваз гьазурнавай справка ва Россиядин Пенсийрин фондуна авай счетдай выписка Госкъуллугърин порталдин куьмекдалди банкунив агакьариз жеда. И справкаяр кризисдин вилик пад кьун патал кьабулнавай цIийи закондин бинедаллаз “кредитдин каникулар” къачунин арза гун патал лазим я.
«Лезги газет»
