Махачкъаладин 84% агьалийри чпин аялриз куьмек патал пул кIватIун лазим яз гьисабзава. Им Россиядин 500 агъзурдалай гзаф агьалияр яшамиш жезвай 37 шегьердин арада виридалайни виниз тир делил я. “Сбербанк страхование жизни” компанияди кьиле тухвай ахтармишунрин нетижада малум хьайивал, хабарар кьурбурун чIехи паюни пулдин такьатар кьве рекьиз кIватIзава — аялриз образование гуниз ва квартира къачуниз.
Ахтармишунри тайинарайвал, аял патал такьатар кIватIунин кардиз итимрилай гзаф дишегьлийри фикир гузва. “Куьне аялриз куьмек патал пулдин такьатар кIватIун лазим яз гьисабзавани?” лагьай суалдиз 65% дишегьлийри разивилин жаваб гана. Ихьтин лазимвал авайди яз гьисабзавай итимрин кьадарни тIимил туш — 59%.
Аялар патал пул кIватIун вири яшарин диде-бубайри дуьз кар яз гьисабзава. 18 йисалай 30 йисал кьван яшда авай диде-бубайрин дестеда аялриз пул кIватIун герек кар яз 64%-ди гьисабзава. 30-40 йисарин яшда авай россиявийрин арада и фикирдал 67% агьалияр ала. Аялрин гележег патал пул кIватIунин фикирдиз амайбурулай гзаф 40-50 йисарин яш хьанвай агьалияр мукьва я — 78%. И фикирдал 50-60 йисарин яшда авайбурун дестедай тир 48% ва 60 йисалай виниз тир яшда авайбурун 37% диде-бубаяр рази я.
Ахтармишунрин иштиракчийривай гьакIни пул кIватIунин рекьерикайни лугьун тIалабна. 70%-ди хабар гайивал, абур пул аялрин образованидин рекьиз, 53%-ди — чпин веледдиз квартира маса къачуниз гьазур тирдакай лагьана. 14%-ди пул аялар чIехи хьайила абурун гъиле такьатар жедайвал, 12%-ди — сагъламвилин рекьиз, 8%-ди — ирс яз агакьарун патал кIватIун лазим яз гьисабзава.
Ахтармишунра иштиракай Махачкъаладин 84% агьалийри веледрин игьтияжар патал пулдин такьатар кIватIун чарасуз тирдакай лагьана. Им Россияда санлай къачур кьадардилай хейлин виниз тир делил я — 62%. Махачкъалавийрин фикирдалди, аялар патал кIватIун лазим тир пулунин лайихлу кьадар 2,8 миллион манатдиз барабар я, хабар гузва компаниядин пресс-къуллугъди.
«Лезги газет»
