Лезги хуьрекар
Лезгийри гзафни-гзаф кьелечI хинкIар гьазурда, амма тупIутIаярни рикI алай тIуьнрикай сад я лагьайтIа жеда. И жуьре хинкIар гьазурун патал чаз малдин якIун са куьк тике ва я кьурурнавай къах герек къведа. Як гьикьван гзаф хьайитIа, гьакьван тIямлу жеда чи хинкIарни.
Сифтедай як чуьхведа, ам цIал ргада. Винел атай каф алудна, са кьадар цIай секинарна, кьел вегьена, сад-кьве сятда ргада, як гьазур жедалди.
Гила чна кака квай тини ишинда.Тини, винел пад кIевна, са кьадар вахтунда тада. Са зур сятдилай хьиз тинидикай куьлуь-куьлуь кIусар атIуз, абурукай тIуб илисна, хумравдин цилиниз ухшар хинкIарар арадал гъида.
Рганвай як хкудна, цIай къати авуна, ргазвай цик тупIутIаяр вегьеда. Сад-садал алкIун тавун патал абурук мукьвал-мукьвал кепкир хкуьрун важиблу я.
Ргана гьазур хьайила, хинкIар синидиз акъудда. Кьилди къапара аваз як ргай шурпани вилик гъида — бязибуру хинкIар шурпадик кваз неда. Винелай кьве тIур хкянек, къатух, вегьеда. Кьилди серг квай къатух ва я серг квай ядни суфрадал гъида. Як кьилди къапуна аваз эцигда. Нуш хьурай квез!
Нарима Агьмедова
