Хабарсуз гьатай тIугъвалди (пандемия) дуьнья вичин къармахра туна. Атана и завал чи республикадивни агакьна. СМИ-ри раижзавай делилрай малум жезвайвал, са куьруь муддатда больницаяр начагъбурай ацIана. Инсанар телеф жезва, бязи хизанрай 2-3 ксарни кьенва лагьай хабарри инсанрин рикIер къарсурзава. КIвалахдай, кIелдай чкаяр, бязи туьквенар, алишверишдин маканар агалнава, эцигунрин объектар вахтуналди акъваз хьанва.
Чи республикада кIвалахдай чкаяр авачирвиляй, гзаф ватанэгьлияр маса регионра яшамиш жезвайди, гьанра кьил хуьзвайди вирибуруз малум я. ТIугъвал акъатуникди, гзафбур кIвалахар амачиз, и кардихъ галаз алакъалу яз хизан хуьдай, кирида кьунвай кIвализ гудай такьатар авачиз амукьнава. Хейлинбур хайи маканриз хтуниз мажбур хьанва. Инсанар кIеве гьатнава. Лугьуда хьи, бенде кIеве гьат тавурай. Гьатнани, адаз куьмек кIан жеда, гьич тахьайтIа, гафунин куьмек кьванни…
Амма чпихъ агьвал авай чи дагъустанвияр, гьа жергедай яз чи ватанэгьлиярни, арадал атанвай гьалариз къерехдихъай килигиз акъвазнач. Абур, кардин гъавурда аваз, дарда гьатнавай инсанриз куьмекар гуз гатIунна, больницайриз герек тадаракар, раб-дарман агакьарна, пулдин такьатар чара авуна. Абурукай сифтени-сифте куьмекдин гъил яргъи авур кас чи баркаллу ватанэгьли Сулейман Керимов хьана. Садазни сир туш, лезги халкьдин кьегьал хци Дагъустандиз лап зурба куьмекар ганва ва и кар гилани давамарзава. Республикадин са шумуд больницадиз медицинадин тадаракар маса къачун патал Сулейман Керимова миллиардрив агакьна пулар ахъайна, тIугъвалдихъ галаз женгина авай духтурриз пулдин премияр тайинарна, Докъузпара райондин вири хуьрерин жемятриз пулдин куьмекар гана, Урусатда виридалайни жегьил алим (илимрин доктор) тир бажарагълу хва Заур Алисултановаз Махачкъала шегьерда кIвалер пишкешна… И сиягь мадни давамариз жеда.
Къейд ийин хьи, и четин макъамда чпин тIварар халкьдин гегьенш къатариз раиж тавуна, хайи районриз, хуьрериз куьмекар гайи рухваярни ава.
“Баркалла абуруз! Чеб Аллагьди хуьрай, чпин девлетрин сан-кьадар мадни артух хьурай”, — лугьузва халкьди. Зани абурун тереф хуьналди хийир-дуьа ийизва а кьегьалриз.
Тамила Салманова,
Мегьарамдхуьруьн райондин
Бут-Къазмайрин хуьр
