Калугада и областдин диспансердин кьилин духтур, медицинадин илимрин доктор Вагьид Абдуллаевич Эфендиев гьар йисуз, отпускдин вахтунда вичин хайи хуьруьз-Советскидиз-хквезва. Ада чеб куьч хьайи куьгьне дагъдин хуьрел — Ялцугърал кьил чIугвада. Шерифали бубадин пIирел, Шалбуз дагъдиз зияратар ийида. Вичин меслятрихъ муьгьтеж инсанриз куьмекарни гуда. ЦIи ам отпускдиз хтай вахтунда зани адахъ галаз суьгьбетарна…
- Вагьид Абдуллаевич, 2011-йисан “Лезги газетдин” январдиз акъатай 1-нумрада куь 70 йисан юбилейдиз талукь “Чи ватанэгьли-чи даях” кьил ганвай макъала чапдай акъатна тамам 7 йис алатнава. И девирда куь уьмуьрда гьихьтин дегишвилер хьанатIа суьгьбетнайтIа кIанзавай.
— Дугъриданни, вахт акуна-такуна физва. Алатнавай йисар рикIел хкайтIа, 70 йисан юбилей къейд авур 2011-йисуз заз “Калужский областдин вилик лайихлувилерай” 3-дережадин, 2013-йисузни 2-дережадин медалар гана. 2014-йисуз лагьайтIа, зун Россиядин Федерациядин духтуррин Президиумдин членвилиз хкяна. Гьа и йисуз за “Онкология” (шикилда) кьил гана медицинадин юкьван персонал ва медучилищейра кIелзавайбур патал кIелунин пособие акъудна.
- Куьне зегьмет чIугвазвай онкодиспансерда чи миллетдин векилри кIвалахзавани?
— Эхь, кьве касди зегьмет чIугвазва. Абурукай сада-Исмаилов Арсена — (адан ери-бине Ахцегьай я) онкоурологиядин отделенидин заведующийдин везифаяр тамамарзава. Къурушви Эфендиева Гуьрчег Султановнади ина духтур-онколог яз кIвалахзава.
- Куьн гьар йисуз хайи хуьруьз хквезва, жемятдал, хайи ерийрал кьил чIугвазва, гьакI тушни!?
— Хайи хуьр, школа, стхаяр-вахар, мукьва-кьилияр, жемят, санал кIелай юлдашар-ибур рикIелай алат тийидай затIар ва ксар, вири санлай кьурла, хайи Ватан я. Чна тербия, меслятар къачур хуьруьн чIехи бубайрин (Мегьали буба, Валегь буба, Исмаил буба, Усман даш — Аллагьди чпиз рагьметар гурай!) сурарал кьил чIугвазва. Им сувабдин кар я. Абурун экуь къаматар рикIелай ракъурун кутугнавач.
Ихьтин дуьшуьш рикIел хкиз кIанзава. Им январдин вацра Ялцугъа хьайи кар я. А чIавуз зи 12 йис тир. Къугъвадайла зи кIвач ханай. Ахцегьиз физ четин тир. Тажир халудини Сейид бубади зи кIвач сагъар хъувуна. А кар себеб яз зун духтурвал кIелиз фена. Гила жувалай алакьдай куьмекар гузва жемятдиз. Хуьруьз хтайла, са отпускдин вахтунда куьмек кIанз вишералди инсанар къведа. За жуван кIвалахдал, жувавай халкьдиз куьмек гуз хьунал пара шадвалзава.
- Вагьид духтур, куьн садра Ватандиз хтайла, Ахцегьа гьар йисуз кьиле тухузвай Шарвилидин суварал дуьшуьш хьанай. Куьне ана иштиракни авунай. А суварикай куь фикир лагьанайтIа кIанзавай…
— Шарвилидин сувар хъсан мярекат я, ада лезги ва Дагъустандин халкьар агудзава. Ам лезги халкьдин дамахни, дережани я. Амма сувар гьар йисуз лезги маса районрани тухванайтIа, заз чиз, хъсан тир.
- Вагьид стха, ви рушари — Ларисадини Тамилади — кьилин образование къачунва, чIехи руша лагьайтIа, медицинадин илимрин кандидатвилин дережа хвенва. Езнеярни кьведни лезгияр я. Хабар кьаз кIанзава, гъвечIи Ватандивай яргъа, урус халкьдин векилрин юкьва хана, чIехи жезвай куь хтулриз лезги чIал чизвани?
— Сулейман муаллим, куьне вилик эцигнавай суалдихъ чи хизан патал кьетIен важиблувал ава. Дугъриданни, гъурбатда авай гзафбур патал дидед чIал квадар тавун, хайи чIалалди рахаз чир хьун-ибур виридалайни четин акъваззавай месэлаяр я. Авайвал хиве кьуртIа, чи хизанда, чIехибуруз виридаз лезги чIалалди рахаз чизва. Чун исятда виридалайни гъвечIи хтулдиз хайи чIалал рахаз чириз алахънава. ИншаАллагь, ам чIал чир хьун патал гьар йисуз отпускдиз хуьруьз хкана кIанда.
- “Лезги газетдихъ” галаз куь алакъа авани? Куьне газет кIелзавани?
— Россиядин прессадин каталогда “Лезги газет” авачирвиляй завай ам Калугада подписка ийиз жезвач. Белки гележегда кхьидай мумкинвал жен. Вахт хьайила, за газет сайтдай кIелзава.
- Вагьид Абдуллаевич, чахъ галаз суьгьбет авунай чухсагъул. Квехъ уьмуьрда, кIвалахда, хизанда вири патарихъай агалкьунар хьурай, гьуьрметлу духтур!
— Куьнни сагърай!
Калугада и областдин диспансердин кьилин духтур, медицинадин илимрин доктор Вагьид Абдуллаевич Эфендиев гьар йисуз, отпускдин вахтунда вичин хайи хуьруьз-Советскидиз-хквезва. Ада чеб куьч хьайи куьгьне дагъдин хуьрел — Ялцугърал кьил чIугвада. Шерифали бубадин пIирел, Шалбуз дагъдиз зияратар ийида. Вичин меслятрихъ муьгьтеж инсанриз куьмекарни гуда. ЦIи ам отпускдиз хтай вахтунда зани адахъ галаз суьгьбетарна…
- Вагьид Абдуллаевич, 2011-йисан “Лезги газетдин” январдиз акъатай 1-нумрада куь 70 йисан юбилейдиз талукь “Чи ватанэгьли-чи даях” кьил ганвай макъала чапдай акъатна тамам 7 йис алатнава. И девирда куь уьмуьрда гьихьтин дегишвилер хьанатIа суьгьбетнайтIа кIанзавай.
— Дугъриданни, вахт акуна-такуна физва. Алатнавай йисар рикIел хкайтIа, 70 йисан юбилей къейд авур 2011-йисуз заз “Калужский областдин вилик лайихлувилерай” 3-дережадин, 2013-йисузни 2-дережадин медалар гана. 2014-йисуз лагьайтIа, зун Россиядин Федерациядин духтуррин Президиумдин членвилиз хкяна. Гьа и йисуз за “Онкология” (шикилда) кьил гана медицинадин юкьван персонал ва медучилищейра кIелзавайбур патал кIелунин пособие акъудна.
- Куьне зегьмет чIугвазвай онкодиспансерда чи миллетдин векилри кIвалахзавани?
— Эхь, кьве касди зегьмет чIугвазва. Абурукай сада-Исмаилов Арсена — (адан ери-бине Ахцегьай я) онкоурологиядин отделенидин заведующийдин везифаяр тамамарзава. Къурушви Эфендиева Гуьрчег Султановнади ина духтур-онколог яз кIвалахзава.
- Куьн гьар йисуз хайи хуьруьз хквезва, жемятдал, хайи ерийрал кьил чIугвазва, гьакI тушни!?
— Хайи хуьр, школа, стхаяр-вахар, мукьва-кьилияр, жемят, санал кIелай юлдашар-ибур рикIелай алат тийидай затIар ва ксар, вири санлай кьурла, хайи Ватан я. Чна тербия, меслятар къачур хуьруьн чIехи бубайрин (Мегьали буба, Валегь буба, Исмаил буба, Усман даш — Аллагьди чпиз рагьметар гурай!) сурарал кьил чIугвазва. Им сувабдин кар я. Абурун экуь къаматар рикIелай ракъурун кутугнавач.
Ихьтин дуьшуьш рикIел хкиз кIанзава. Им январдин вацра Ялцугъа хьайи кар я. А чIавуз зи 12 йис тир. Къугъвадайла зи кIвач ханай. Ахцегьиз физ четин тир. Тажир халудини Сейид бубади зи кIвач сагъар хъувуна. А кар себеб яз зун духтурвал кIелиз фена. Гила жувалай алакьдай куьмекар гузва жемятдиз. Хуьруьз хтайла, са отпускдин вахтунда куьмек кIанз вишералди инсанар къведа. За жуван кIвалахдал, жувавай халкьдиз куьмек гуз хьунал пара шадвалзава.
- Вагьид духтур, куьн садра Ватандиз хтайла, Ахцегьа гьар йисуз кьиле тухузвай Шарвилидин суварал дуьшуьш хьанай. Куьне ана иштиракни авунай. А суварикай куь фикир лагьанайтIа кIанзавай…
— Шарвилидин сувар хъсан мярекат я, ада лезги ва Дагъустандин халкьар агудзава. Ам лезги халкьдин дамахни, дережани я. Амма сувар гьар йисуз лезги маса районрани тухванайтIа, заз чиз, хъсан тир.
- Вагьид стха, ви рушари — Ларисадини Тамилади — кьилин образование къачунва, чIехи руша лагьайтIа, медицинадин илимрин кандидатвилин дережа хвенва. Езнеярни кьведни лезгияр я. Хабар кьаз кIанзава, гъвечIи Ватандивай яргъа, урус халкьдин векилрин юкьва хана, чIехи жезвай куь хтулриз лезги чIал чизвани?
— Сулейман муаллим, куьне вилик эцигнавай суалдихъ чи хизан патал кьетIен важиблувал ава. Дугъриданни, гъурбатда авай гзафбур патал дидед чIал квадар тавун, хайи чIалалди рахаз чир хьун-ибур виридалайни четин акъваззавай месэлаяр я. Авайвал хиве кьуртIа, чи хизанда, чIехибуруз виридаз лезги чIалалди рахаз чизва. Чун исятда виридалайни гъвечIи хтулдиз хайи чIалал рахаз чириз алахънава. ИншаАллагь, ам чIал чир хьун патал гьар йисуз отпускдиз хуьруьз хкана кIанда.
- “Лезги газетдихъ” галаз куь алакъа авани? Куьне газет кIелзавани?
— Россиядин прессадин каталогда “Лезги газет” авачирвиляй завай ам Калугада подписка ийиз жезвач. Белки гележегда кхьидай мумкинвал жен. Вахт хьайила, за газет сайтдай кIелзава.
- Вагьид Абдуллаевич, чахъ галаз суьгьбет авунай чухсагъул. Квехъ уьмуьрда, кIвалахда, хизанда вири патарихъай агалкьунар хьурай, гьуьрметлу духтур!
— Куьнни сагърай!
Сулейман Пашаев,
Советский хуьр
