Кьурагьай Ватандин ЧIехи дяведин къизгъин женгера иштиракун кьисмет хьайибурун арада Абдуллаев Абдуллагьан хва Хидирнебини авай. 1939-йисуз адаз Яру Армиядин кьушунриз эвер гана. ВикIегь кьурагьвиди Украинадин мулкарал пехотадин кьушунрин разведкадин ротада намуслувилелди къуллугъзавай. Дяве гатIунай сифте йикъалай ам душмандихъ галаз кьиле физвай женгерик экечIна.
1942-йисан гатуз Сталинграддиз мукьва мулкара Хидирнеби Абдуллаевал гуьлледин хер хьана. Дяведин сад лагьай хер. Гьа и йисан октябрдин вацралди ам сагъламвал мягькемар хъийиз госпиталда амукьна. КIвачел ахкьалтай дирибаш аскер элкъвена фронтдиз хтана. Кьисметди ам мад Сталинграддин патарив ахкъуднай.
Хидирнеби Абдуллаева Дондал алай Ростов, Донбасс, Запорожье, Одесса ва хейлин маса шегьерар душмандикай азад авунин женгера иштиракна. Гзаф ягъунра ада акьалтIай викIегьвал къалурна. Мисал яз, Польшадин мулкарал женгер кьиле физвай чIавуз кьурагьвиди къуллугъзавай разведкадин десте душмандин далу патаз фена ва абуру немсерин кар алай офицеррикай сад есирда кьуна. Гьа и кар себеб яз, Хидирнеби Абдуллаеваз «Яру Гъед» орден гана.
“Яру Гъетрен” ордендиз ам кьвед лагьай сефердани лайихлу хьана. Берлин къачудайла къалурай викIегьвилерай.
Дяве куьтягь хьайи 1945-йис Хидирнеби Абдуллаев патал агъурди хьанай. Адахъ нубатдин сеферда душмандин гуьлле галукьна. Залан хер хьанвай ам мад госпиталдиз аватнай. СССР-дин оборонадин министерстводин архивдай ганвай справкада къейднавайвал, госпиталдай ам 19-майдиз аххъайна.
Ватандин ЧIехи дяведин женгера къалурай дирибашвилерай ам «Яру Гъетрен» орденрилай гъейри, Баркаллувилин ордендизни, «Жуьрэтлувиляй» медалдизни ва хейлин маса шабагьриз лайихлу хьана.
Дяведилай кьулухъ хайи хуьруьз хтай ада хизан кутуна, кьве хва чIехи авуна, уьмуьрдин шегьредал акъудна, яргъал йисара районда комитетдин председатель яз кIвалахна.
Хидирнеби Абдуллагьович 1994-йисан 4-декабрдиз рагьметдиз фена. Хизанри, мукьва-кьилийри чпин гьунарлу чIехи бубадин экуь къамат эбеди яз рикIера хуьзва.
Агьмед Магьмудов
