Ери-бине Сулейман-Стальский райондин Агъа СтIалрилай тир  Мамед  Мамедов  военный училищедин курсант тир. Ватандин ЧIехи дяве гатIунай сифте йикъара ам фронтдиз тухванай.

“1942-йисан майдин вацра Яру Армиядин лейтенант Мамедов Мамед Эмирханович гел галачиз квахьна”, — ла­гьай хабарди адан хизан къарсурнай, рикIера гуьлле галукьай хьтин хер хьанай.

Амма лейтенантдин багърияр Аллагьдиз язух атана. Тамам 70 йис алатайдалай кьулухъ Мамед Мамедован женгинин рекьикай, ада дяведа тур гелерикай малум хьана.

Смоленск шегьер фашистрикай азад авун патал гзаф къати женгер кьиле фенай. И мулкара гзаф ивияр экъична, чи йикъарани инин чиликай дяведин йисарин яракьар жагъизма….

Вяземский райондин Кайдаково хуьруьн мукьварив “Долг” тIвар алай отрядди ахтармишунрин кIвалахар кьиле тухузвай. И вахтунда абуруз Советрин гзаф аскерар санал кучукнавай стхавилин сурар жагъана. Анайни дяведин йисара телеф хьайи аскерриз талукь цIийи делилар винел акъатна. Абурун арада кьегьал лезги хва, взводдин командир, лейтенант Мамед Мамедовни авай.

Кьилди къачуртIа, адан аскервилин хсуси медальон, адакай куьруь малуматар жагъана. Гьа икI, 70 йис арадай фейила, багърийриз чпин кьегьал хцин кьисметдикай, ада регьбервал гузвай взводди­ немсерин са шумуд сеферда чпелай артух къуватлу кьушунрихъ галаз тухвай ри­кIелай алат тийидай хьтин женгиникай, аскеррин кьегьалвилерикай чир хьана.  Мамед Мамедова игитвилелди чан гудайла, адан анжах 20 йис тир. 20 йиса аваз лейтенантдин чин къачун­, взводдин командир хьун, са шакни ала­чиз, адан викIегь­ви­лин, жуьрэтлувилин гьакъиндай шагьидвалзавай делилар я.

Къейд ийин хьи, лезги хци регьбервал гузвай взвод фашистрихъ галаз кьиле фейи къати женгина телеф хьана. Ви­ри взвод “Поле памяти” тIвар алай мемориалдин комплексда аскеррин сурара фаракъат авунва.

Гел галачиз квахьнавай чпин багъридикай делилар жагъуни Мамед Мамедован мукьвабурук дамахдин гьиссер кутуна. Абуру адан суралай накьв хкана. Гила викIегь лейтенантдиз хайи Ватандани эхиратдин кIвал кьисмет хьана.

Гьайиф хьи, дяведа гел галачиз квахь­навай гзаф аскеррин кьисметар чаз гьеле малум туш…

Мадина  Мамедова