Коронавирусдин тIугъвалди арадал гъанвай четин гьалариз килигна, ингье чун кьве вацралайни артух вахтунда самоизоляциядин шартIара аваз яшамиш жезва, кIвалахзава. ЦIийи жуьредин стIалжемдикди начагъ жезвайбурун кьадар тIимил тахьуни еке къалабулух кутазва. Интернетдин сетрай, телевиденидай аквазвай хабарриз килигайла, неинки кьилин регионра, гьакI Дагъустандани гьалар пайгарбур туш. Коронавирус, стIалжем акатайбурун кьадар чи республикада лап гзаф хьуниз килигна, региондин кьиле авай ксари, здравоохраненидин министерстводи чарасуз серенжемар кьабулзава…
ИкI, Дербентда, Дербент райондин Падар хуьре коронавирус акатнавай азарлубур кьабулун патал больницайра провизорный госпиталар ахъайна. Са куьруь вахтунда абур цIийи азардикди начагъ жезвайбурай ацIана. Винидихъ тIварар кьур госпиталра койка-чкаяр бес тежез акурди, республикадин здравоохраненидин министерстводи тади гьалара Белиж поселокдин участковый больницани провизорный госпиталдиз элкъуьрдай къарар кьабулна.
Белиждин клинический больницадин кьилин духтур Рамазан Тагьирбегован гафарай малум хьайивал, республикадин здравоохраненидин министерстводай приказ атанмазди, кьве йикъан къене поселокдин больница Роспотребнадзордин истемишунрив кьадайвал, коронавирус ва стIалжем акатайбур сагъардай 50 койка-чка авай тамам госпиталдиз элкъуьрна. Ана “яру” ва “михьи” зонаяр тайинарна. Махсус санитарный зона тешкилна, душдин кабина ва яд чимдай кьве тадарак эцигна. ГьакIни лазим тир вири серенжемар кьиле тухвана. Инаг азарлубур сагъардай кьве зонадиз (регьят ва юкьван гьалда авайбур) пайна. Четин гьалда авайбур Дербентдиз ракъурзава. Дежурство тухун патал духтуррикайни медсестрайрикай ибарат пуд бригада тешкилна. Гьар са бригада 18 касдикай ибарат я. Аник 4 духтур, 8 медсестра ва 6 санитарка ква. Дежурствода авай бригада азарлубурухъ галаз 14 юкъуз санизни тефиз агалнавай госпиталда ава. Азарлубур авай зонадиз бригада махсус парталар алукIна физва. Ана 6 сятина кIвалахиз, 6 сятина ял язава.
Рамазан Тагьирбегован гафаралди, Белиждин госпиталдиз азарлубур Дербент шегьердай, Дербент райондин саки чIехи пай хуьрерай, Табасаран райондин Сюгют, Сиртич, Дарвагъ, гьакIни Агъул райондайни тади куьмекдин машинра аваз агакьарзава. Азарлуйрин кьадар гзаф жез акурди, кьилин духтурди мад 12 койка-чка тешкил хъувуна. ИкI, санлай къачурла, сифте бригадади 62 касдиз къуллугъзавай.
— Аллагьдиз шукур, — лугьузва Рамазан духтурди, — гьелелиг Белиждин госпиталда кьейибур авач. Сифте яз ихьтин муракаб гьалара икьван гзаф начагъбурухъ гелкъвей сад лагьай бригадади чпин хиве авай везифаяр лап вини дережада аваз кьиле тухвана. Сагъ хъувуна, 62 кас кIвалериз ахъайнава. Лагьана кIанда, духтурри военный хьтин, четин шартIара чIехи пешекарвилин дережа къалурна, чпин буржи намуслувилелди кьилиз акъудна. Ингье абур: терапевт Бутаева Анжела, невролог Ибрагьимов Эмиран, отоларинтолог Ибрагьимов Эрзиман, кардиолог Эскендеров Аюб, медсестраяр — Гьайвазова Айсанат, Гьайвазова Гуьлли, Идрисова Наида, Дадашева Гульнара, Мирзекеримова Эвелина, Мегьамедова Сабина, Севзиханова Эльмира, Мирзабегова Цуькверханум, санитаркаяр — Салманова Динара, Мевланова Цуьквер, Севзиханова Гуьлуьмагъа, Эминова Мерженат, Агьмедова Анжела ва Къазанфарова Гуьлуьмагъа. Заз абуруз сагърай лугьуз кIанзава, — алава хъувуна ада.
Алай вахтунда 14 юкъуз сифте сменада кIвалахай сад лагьай бригада кьилдин отделенида 14 юкъуз самоизоляцияда ава. И йикъара абуруз кIвализ хъфидай ихтияр авач. Начагъбурукай духтуррик азар акатнавани, акатнавачни ахтармишзава.
Чун Рамазан Тагьирбеговичахъ галаз самоизоляцияда авай духтуррал кьил чIугваз фейила, иниз нисинин вахтунда недай суьрсет гваз кьве кас атана, варарихъ акъвазнавай.
Ихтилатрай малум хьайивал, абур коронавирус-стIалжем акатна, госпиталда сагъар хъувунвайбур — нуьгдиви Асланбегни белижви Мегьамеднеби тир, духтурриз сагърай лугьуз атанвай.
— Заз Белиждин госпиталда сагъар хъувунвай виридан тIварцIихъай чахъ хъсандиз гелкъвей бригададиз ва иллаки духтурриз важиблу ва гьакъисагъ зегьметдай сагърай лугьуз кIанзава. Ихьтин пеше анжах вич лап хъсан, чарадан дердиникай, бедбахтвиликай хабар кьадай касдивай хкягъиз жеда. Къуй квел уьмуьрда хъсан инсанар дуьшуьш хьурай! Къуй куьне авунвай хъсанвилер, квев са шумуд сеферда артух хьана агакь хъувурай, — алхишна Асланбега.
Къе уьзуьрди арадал гъанвай четин шартIара духтурри чпин кIвалах намуслудаказ кьиле тухузва. Абуру чпин сагъламвилелайни гъил къачуна, маса инсанриз куьмек гузва, ихьтин кIвалахар чи медицинадин чIехи тарихда инлай виликни са шумудра хьайиди я.
Чи мурад ам я хьи, къуй куь гьакъисагъ зегьметдиз неинки сагъ хъхьанвай инсанри, гьакI гьукуматдини лайихлу къимет гурай. И четин шартIара инсанрин сагъламвилин къуллугъда акъвазнавай квез къуй кьисметди чимивал ва лап хъсан савкьатар багъишрай!
Макъала заз тIугъвалдихъ галаз женг тухузвай духтурриз бахшна соцсетра пайда хьанвай шиирдин са бендиналди акьалтIариз кIанзава:
Сагъвал хуьз халкьдин — постуналла куьн,
Алахъна экъечIиз рекьерай четин.
Коронавирусдиз жагъуриз дарман
Аллагьди квез гурай къуватни сагъ чан!
Къагьриман Ибрагьимов
