Играми ватанэгьлияр, мусурман стхаярни вахар!

Акваз-такваз варцарин шагь тир Рамазандин варзни акъатна. ЦIи ам мусурманри тIугъвал себеб яз кьетIен шартIара кьиле тухвана. Адетдин къайдада мискIинриз физ, санал ифтарар тешкилиз хьанач. Амма сивер хуьниз, шукур хьурай Аллагьдиз, са куьнини манийвал ганач.

Рамазандин вацра сивер хуьнихъ еке метлеб ава. И кар гьадисрини тестикьарзава. Мисал яз, са гьадисда лагьанва: «Женнетдихъ муьжуьд варар ава. Абурукай сад  “Раййан” тIвар алай варар я. Анай анжах сив хвейибур гьахьда» (Бухарий, Муслим).

Рамазандин вацран кьетIенвал и гьадисдини къалурзава: Абу Хурайради агакьарайвал, Пайгъамбарди (къуй Аллагьдин патай салават ва саламар хьурай вичиз) лагьаналда: «Ни Рамазандин вацра рикIин сидкьидай иман гваз ва Аллагьдин патай сувабар агакьуник умуд кваз сивер хвенатIа, адан виликан вири гунагьрилай гъил къачуда» (Бухарий, Муслим).

Играми ватанэгьлияр! «Лезги газетдин» редакциядин коллективди квез Сив хуьнин сувар рикIин сидкьидай мубаракзава! Къуй Рамазандин вацра чна кьур сивер, гайи садакьаяр, авур кпIар, вири ибадатар Аллагьди кьабулрай. Чаз квехъ чандин сагъвал, бахтлувал, агалкьунар хьана кIанзава. Къуй гьар са къадамда чаз Аллагьдикай куьмек хьурай! Амин!

«Лезги газет»