Ватандин ЧIехи дяведин йисара 3 агъзурдалайни гзаф докъузпаравияр, гьа жергедай яз 138 кас Къалажухрин хуьряйни женгерин майданриз фена. Душманар дарбадагъунин къастар рикIе тур аскерри СССР-дин хейлин шегьерар азадунин къати ягъунра иштиракна. Са пай женгчияр дяведа гел галачиз квахьна, бязибур набутар яз ватандиз хтана. Гьелбетда, далу пата зегьмет чIугунин кардани кIелетвияр кьулухъ галамукьнач.
Советрин халкьари мусибатдин шартIара къазанмишай Гъалибвилин 75 йис тамам хьанвай чи йикъара а дяведа иштиракай ветеранрикай Докъузпара районда амайди тек сад я — Атамов Межид Салигьович. Дагълух Къалажухрин хуьре яшамиш жезвай, 95 йисан яшда авай ветеранди 77 йис идалай вилик, 1943-йисуз, гьеле 7 йисан мектеб акьалтIарнавай жегьил яз, фронтдиз фин кьетIна.
СССР-дин ПВО-дин 57-зенитный дивизиондик кваз къалурай викIегьвилерай ам “Германиядин винел гъалибвал къачунай”, “Кавказ оборона авунай”, “Жуьрэтлувиляй” шабагьралди къейдна.
Йис-сандавай дяведин ветеранрин кьадарни тIимил жезва. Амма абурун кьегьалвилер, ватанпересвилер несилар патал мидаим чешнейриз элкъвенва. Мад са хъсан делил ам я хьи, гьукуматди, машгьур меценатри ветеранриз куьмекар гузва. Алай вахтунда сагъзамай дагъустанвийрив-ветеранрив, гьа жергедай яз къалажухви Межид Атамовавни, и мукьвара тIвар-ван авай чи ватанэгьли Сулейман Керимован патай 1 миллион манатдин пишкеш агакьна.
Гъалибчияр вири жуьредин шагьабриз лайихлу я!
Чи мухбир
