Медицинадин идарайриз куьмек гун ва коронавирусдиз акси дарманарни антибиотикар маса къачун патал региондин бюджетдай 233,5 миллион манат чара авунва. ГьакIни, Россиядин Гьукуматдин резервдин фондунай медицинадин идарайра коронавирус азардихъ галаз женг чIугвазвай къуллугъчияр ашкъиламишун патал 340 миллион манат ахъайнава. 2020-йисан 8-майдалди авай гьаларал асаслу яз, алава пулар 235 духтурдиз ганва.
Идалайни гъейри, РД-дин Гьукуматдин къарардалди, республикадин Гьукуматдин резервдин фондунайни кьетIен шартIара ва азаб алаз кIвалахунай духтурар ашкъиламишун патал 149,2 миллион манат (1-апрелдилай 30-июндалди гун патал) чара авунва. ИкI, и йикъара, яни майдин сифтегьан паюна, духтурриз апрелдин вацра зегьмет чIугунай пулар гуда. Идахъ галаз сад хьиз, Дагъустандин бюджетдай ахъайнавай алава пулар агъадихъ галайбуруз гуда: стIалжем (внебольничная пневмония) хьанвайбурухъ азарханайра гелкъвезвай духтурриз, гьакIни коронавирусдин ва стIалжем азарар акатнавайбуруз медицинадин рекьяй куьмек гун патал шартIар яратмишзавай ва чеб федеральный бюджетдай чара авунвай такьатар гуник акат тийизвай къуллугъчийриз. Алай вахтунда республикадин бюджетдин такьатрин гьисабдай алава пулар гудай ксарин сиягьар гьазурзава.
«Лезги газет»
