Образованидинни илимдин рекье гуьзчивал авунин федеральный къуллугъди (Рособрнадзор) образованидин управленийрин регионра авай органриз 2020-йисан майдин игьтиятдин (резервдин) вахтунда урус чIалай нетижаяр кьадай сочинение ва нетижаяр кьадай ихтилат (собеседование) тухудай къайдадин гъавурда твадай чар рекье тунва.
Нетижаяр кьадай сочинение ва нетижаяр кьадай ихтилат агалкьунралди вахкун мектебрин 9 ва 11-классра кIелзавай аялар патал государстводин нетижаяр кьадай аттестациядив гатIундай ихтияр гузвай чарасуз шартI я.
2020-йисан 99 процентдилай артух выпускникри и имтигьан нетижалудаказ вахканва ва “зачет” къачунва. Амай аялар патал игьтиятдин вахт фикирда кьунва: 25-май — 11-классра нетижаяр кьадай сочинение кхьин ва 18-май — 9-классра нетижаяр кьадай ихтилат авун патал.
Нетижаяр кьадай сочинение ва нетижаяр кьадай ихтилат регионривай тайинарнавай вахтунда кьиле тухуз жеда, хабар гузва Рособрнадзорди.
Эгер хаталу азар чукIун себеб яз арадал атанвай гьалари ва бязи регионра кьабулнавай сергьятламишунин серенжемри и кар кьилиз акъуддай мумкинвал тагайтIа, Рособрнадзорди, 9 ва 11-классра государстводин нетижаяр кьадай аттестациядин вахт алукьдалди абур патал и имтигьанар кьиле тухудай цIийи йикъар тайинарда.
Регионрихъ гьакIни 9-классда урус чIалай нетижаяр кьадай ихтилат яргъал мензилда аваз кьиле тухудай мумкинвал ава. И кар патал абурухъ лазим тир материально-технический бине, гьакIни имтигьандин гуьзчивалдай ва гьисабунардай материалрин делилар чукIуникай хуьдай шартIар хьун лазим я.
«Лезги газет»
