РД-дин образованидин ва илимдин министр, вице-премьер Уммупазиль Омаровади социальный сетра эхиримжи вахтара активнидаказ веревирдзавай мектебар тамамдиз аялрихъ галаз яргъал мензилда аваз кIвалахдай къайдадал элячIунин месэладиз талукь баян гана.
“Республикадин мектебра аялрихъ галаз яргъал мензилда аваз кIвалахдай къайдада чирвилер гун — им чи регионда COVID-19 чукIунин вилик пад кьун патал кьабулнавай чарасуз серенжем я. И кар чи муаллимрин ва аялрин хатасузвал патал лазим я. Чирвилер гунин кIвалах аялар яргъал мензилда аваз тешкилун — им асант кар туш. Чи муаллимар онлайн къайдада чпин кIвалах хъсанариз алахънава. Абурал исятда еке пар ва жавабдарвал ала. Аялриз яргъал мензилда аваз чирвилер гун чун патал цIийи тежриба я, амма и къайдадивай садрани мектеб эвезиз жедач. Чна умуд кутунва, гьалар хъсан патахъ дегиш жеда ва 1-сентябрдиз вири аялар мектебриз фида”, — лагьана У.Омаровади.
РикIел хкин, идалай вилик РФ-дин просвещенидин министр Сергей Кравцова чирвилер гудай идараяр мукьвал вахтунда адетдин къайдадал хтунин мумкинвиликай лагьанай. Яргъал мензилда аваз тарсар гудай тежриба лагьайтIа, образованидин система мадни хъсанарун патал ишлемишда. Ада гьакIни адетдин школадин къайда яргъал мензилдин къайдадалди эвезунин мумкинвал инкарна.
«Лезги газет»
