Лезги медениятдиз чIехи магьрумвал кьисмет хьана: 69 йисан яшда аваз чи арадай Дагъустандин халкьдин артист, актер ва режиссер Мирзебег Къадирович Мирзебегов акъатна.

М.Къ.Мирзебегов 1950-йисан 3-сентябрдиз Кьасумхуьруьн райондин (гилан Сулейман-Стальский район) КIеле хуьре дидедиз хьана. Гьеле мектебда кIелзавай йисарилай ам театрдал ашукь тир. Гележегдин чIехи актер мектебда кардик квай кружокдин активный иштиракчи хьана. 1968-йисуз ам Азербайжандин М.-А.Алиеван тIварунихъ галай искусствойрин институтдин актерар гьазурдай факультетдик экечIна.

1972-йисуз институт акьалтIарнавай жегьил актер Дербентдиз куьч хьана ва Лезги театрда кIвалахал акъвазна. ЦIудралди жуьреба-жуьре ролар тамамарай Мирзебег Мирзебегов тамашачийрин рикI алай артистдиз элкъвена. Милли театрдин сегьнедал ада чан гъайи сад лагьай къамат “Фендигарвал ва муьгьуьббат” тамашадик­ квай Фердинандадинди тир.

Алатай асирдин 70-йисара М.Мирзебегова тамашачийри хушдиз кьабулай мад са шумуд образ арадал гъана: Дамдинан (“Сандухда шейтIан”), везирдин (“Периханум”), Асланан (“Урусатдин цуьк”), Клеантан (“Мискьиди”), Къадиран (“Къуншияр”), Дагъларан (“Ашукь Саид”) ва масабурун.

80-йисар актер патал пара бегьерлубур хьана. И йисара ада Шекспиран трагедиядин бинедаллаз эцигнавай тамашада Лирадин пачагьдин, “Агь, куьн, итимар” тамашада — Тарханан, “Дагъвияр” тамашада —  Исмаилан, “Айдин” тамашада — Девлет беган, “Фундугъбег” тамашада — Манкъулидин, “Дагълари эверзава” тамашада — Зулуман ва масабурун ролар тамамарна.

1984-йисуз театрдин коллективди алакьунар авай жегьил актер ГИТИС-диз режиссервилин кьилин курсариз­ рекье туна. Курсар акьалтIарайдалай кьулухъ ам хайи театрдиз хтана ва режиссердин везифайрив эгечI­на.

1985-йисалай инихъ Мирзебег Мирзебегова Лезги театрда 60-далай виниз, табасаранрин театрда цIудав агакьна тамашаяр эцигна. Ада эцигзавай тамашаяр устадвилин чIехи дережадалди тафаватлу жезвай. Абурун жергеда ихьтин тамашаяр авай: В.Столярован ва Н.Мирошниченкодин пьесадин бинедаллаз эцигнавай “ЦIийивал”, А.Аминован “Риб чувалда чуьнуьхиз жедач”, Т.Орловадин “Пачагь Фердинандадин муьгьуьр”, Ж.Мурадалиеван “Тахай руш”, Б.Алибеговадин “Бал­хун кIвал туш”, А.Исмаилован “Чигали”, А.Мегьманан “Шуршурали”, Ф.Бадалован “Филиал”, С.Рамазанован “КьепIир Айисат” ва масабур.

Эхиримжи йисара Мирзебег Мирзебегова Лезги театрдин сегьнедал Г.Хугаеван “Зи ярандиде”, А.Атнабаеван “Агь, и варз алай йифер”, А.Исмаилован “Пуд югъ”, “Аль-Мамнунан чирагъ” ва масабур эцигна. Тамашачий­рини абур хушдиз кьабулна.

Бажарагълу актер, алакьунар авай режиссер хьиз, М.Мирзебегов хъсан драматургни тир. Адан къелемдикай “Сеанс давам жезва”, “Булахдин сир”, “Кефербег” (М.Рустамовахъ галаз санал кхьенвай), “Къанихвал” (Ш.Герейхановахъ галаз санал кхьенвай) ва маса пьесаяр хкатна. Мадни ам хъсан сценаристни тир. М.Мирзебегова СтIал Сулейманан, Б.Айдаеван, М.Къухмазован, Ш.Къухмазовадин, И.Рамазанован, А.Гьабибован ва масабурун юбилейриз талукьарнавай мярекатрин сценарияр гьазурна.

Яргъал йисара республикадин милли медениятдин хиле бегьерлудаказ кIвалахунай адаз “РД-дин лайихлу артист” (1996-йис), “РД-дин халкьдин артист” (2007-йис) тIварар гана.

2013-2019-йисара М.Мирзебегова Лезги театрдин кьилин режиссер яз кIвалахна.

Мирзебег Къадирович “Лезги газетдин” вафалу амадагрикайни сад тир. Дербент шегьерда хайи чIалал акъат­завай газетдин тираж артухаруник ада вичин пайни кутазвай. Гьамиша редакциядихъ галаз алакъаяр хуьзвай, мярекатрик иштиракзавай. Са гафуналди, ам чи редакциядин багьа мугьман, коллективдин вафалу дуст тир.

“Лезги газетдин” редакциядин коллективди адан хизанриз, багърийриз, вири мукьва-кьилийриз, дериндай хажалат чIугунивди, башсагълугъвал гузва. Чешнелу хизандин кьил, къени, заха инсан, бажарагълу пешекар Мирзебег Мирзебегован экуь къамат чи рикIера гьамиша амукьда.