Дагъустандин Кьил Владимир Васильева РД-дин карчивилин ва инвестицийрин Агентстводин кьиле Камил Мегьамедов тайинарнава. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Къейд ийин хьи, К.Мегьамедован ери-бине Ахцегь райондин Хуьруьгрин хуьряй я. Виликдай ада тIвар кьунвай Агентстводин руководителдин сад лагьай заместителдин везифаяр тамамарзавай.
Камил Мегьамедован 35 йис я. Ада Москвада Урусатдин МИД-дин МГИМО, РФ-дин юстициядин министерстводин правовой академияда магистратура акьалтIарна.
К.Мегьамедова Ахцегь районда авай «Люминарий» центрадин проектдиз регьбервал гана. Адаз фасагьатдиз урус, лезги ингилис ва араб чIалар чизва. 10 йисан къене ам IT-дал ва финансрин месэлайрал машгъул хьана.
РикIел хкин, РД-дин карчивилин ва инвестицийрин Агентство 2016-йисуз арадал гъана. Асул гьисабдай, ада карчивал вилик тухунин, инвестклимат хъсанарунин, инвестицияр желб авунин, карчивилин хиле кIвалахзавайбурал государстводин къуллугъар агакьарунин месэлаяр кьилиз акъудзава.
«Лезги газет»
