Мигьамедов Абдулвагьаб 1916-йисуз Хив райондин ЦIинитIрин хуьре лежбердин хизанда дидедиз хьана. Ада хуьруьнбурукай сифте яз Дербентдин педтехникум куьтягьна ва Хив районда культура тунин жигьетдай еке зегьметар чIугуна. Адакай райондин халкьдин образованидин отделдин начальник, соцкультурадин отделдин директор хьана.
1939-йисуз А.Мигьамедов Ватан белофиннрикай хуьн патал дяведиз фена. Фронтдин командованиди ам Къазандин летчикар гьазурдай училищедиз рекье туна.
1941-йисан августдин вацра ада немсерин чапхунчийрихъ галаз Кеферпатан фронтда цавун дяве тухвана.
Абдулвагьаб Мигьамедова Волковдин, Брянскдин фронтда лётчик-истребитель яз пудкъад сеферда цавуз хкаж хьана, фашистрихъ галаз дяве тухвана, душмандин 12 самолет, 24 танк, яхцIурдалай виниз дяведин техника, вишералди душманар тергна.
1942-йисан 27-майдиз ада вичин къаншардиз экъечIай фашистрин МЭ-109 маркадин самолёт яна, гадарна. И женгерин гьунарриз килигна, адаз “Яру Гъетрен” ва 1942-йисан 6-июндиз “Яру Пайдахдин” орденар гана.
И чIехи шабагьар гудалди вилик лётчик Абдулвагьабан дяведин агалкьунар цIудалай виниз медалралдини грамотайралди къейднавай.
Вичиз секинвал хьайи декьикьайра жегьил дагъвидин вилерикай свас Имина, куьрпе бала Абдулмажид карагзавай ва ада абуруз вич гъалибвал гваз хкведайдакай кагъазарни кхьенвай. Амма кьисметар масакIа элкъвена.
1942-йисан 6-августдиз ЦIинитIрин хуьруьз чIулав хабардин тел агакьна. Ана 1942-йисан 27-июндиз душмандихъ галаз хьайи цавун дяведа Мигьамедов Абдулвагьаба 26 йисан яшда аваз игитвилелди Ватан патал чан гайидакай малумарнавай…
Игит лётчик Орловдин областдин Левенский райондин Вязовая Дубрава хуьруьн сурара кучукнава.Кьегьалар, игитар гьич са чIавузни рекьидач. Абурун тIварарни крар виш йисара амукьда.
Мигьамедов Абдулвагьабан тIвар ЦIинитIрин юкьван школадиз, хуьруьн са куьчедиз ганва. Адаз школада еке стенд туькIуьрнава ва адан уьмуьрдин, дяведин агалкьунрикай акьалтзавай несилриз тарсар гузва, суьгьбетар ийизва.
И школада Абдулвагьабан хва Абдулмажида саки 25 йисуз школадин директор-муаллим яз кIвалахна.
Рамазан Велибегов
