Вичин ери-бине Ахцегь райондин Къурукаларин хуьряй тир тlвар-ван авай футболист, ватанперес жегьил Мегьамед Алишеван (шикилда) алакьунрихъни агалкьунрихъ галаз чна “Лезги газетдин” кlелчияр алатай йисара танишарнай. Пешекарвилин футболдин имтигьанрай ам, сифте Дагъустанда “Анжи 2”, “Дагдизель” командайра къугъвадайла, акъатнай. Алай вахтунда ам Брянск шегьердин “Спутник” командадик кваз къугъвазва.
И мукьвара ада, Дагъустан патал гзаф кьадарда хъсан крар кьилиз акъудзавай машгьур лезги Сулейман Керимован тереф хуьниз талукьарна, “Ахцагь” ва “Нарын Къала” командайрин арада финалдин къугъун кьиле тухунин теклиф гана.
“Фейсбук” соцсетда Мегьамед Алишева къейд авурвал, вичин теклиф РФ-дин Госдумадин депутат Къурбанов Ризван Данияловича хъсанди яз гьисабна ва кьилиз акъудун патал куьмекни гана.
Тlварар кьунвай командайрин арада финалдин къугъун Дербент шегьерда, С.Керимован къаюмвилик кваз туькlуьрай майдандал, кьиле фена. Къугъун Ахцегьрин командади 4:1 гьисабдалди гъалибвал къачуналди куьтягь хьана.
Къугъун куьтягь хьайидалай кьулухъ, кьве командадин футболистарни тренерар майдандин юкьвал кlватl хьана ва абуру гъилера С.Керимован плакатар аваз шикилар яна.
“Мукьвара ихьтин жуьредин матч Махачкъаладани кьиле тухуда”, — алава хъувуна тешкилатчи М.Алишева.
Дагъви Шериф
