Дуьньядин винел инсандиз сифте нубатда кIанзавайди сагъвал я. Ам виридалайни чIехи, багьа, гьич са куьнивни гекъигиз тежедай девлет тирди виридаз чида. Сагъвал авачирла, гьич са затIунини дад гудач.
Гьайиф хьи, гзаф вахтара жуьреба-жуьре тIалри инсанриз чеб алай чка къалурда. Сагъламвал хуьнин къаравулда акъвазнавай, чпи гьакъисагъвилелди зегьмет чIугвазвай духтурар, медсестраяр, фельдшерар чахъ вишералди ава. Абурун чирвилери, ширин мецери инсанриз сагъвал багъиш хъийизва.
Къенин чи суьгьбетни ахьтинбурукай сад тир Рустамханов Рамазанакай я. 2010-йисуз Хив райондин Цналрин юкьван школа акьалтIарай Рамазан медучилищедик экечIун патал Дербентдиз фена. Лап хъсандиз гьазур хьанвай гададикай студент хьана. Адаз духтурвилин пеше лап гъвечIи классра амаз кIанзавай. “Зи гележегдин пеше” темадай сочинение гайилани, ада духтурвилин пеше хкядай. Студент гьасятда кIелунин яцIа гьатна. Лекцийриз яб гун, хъсандиз кIелун, тежрибадин тарсарани амай студентриз чешне хьун вири йисара давам хьана. 2015-йисуз ам хайи хуьруьз кIвалахиз хтана…
Са куьру вахтунда жегьилдилай вичин намуслу ва гьакъисагъ зегьметдалди агьалийрин, азарлуйрин патай аферин ва баркалла къазанмишиз алакьна. Адан гъиликай себеб-дарман хьайи са шумуд цIудралди ксари адаз алхишзава. Зун “Лезги газетдин” штатдик квачир корреспондент тирди чизвай, чеб сагъар хъувур гзаф агьалийри Рамазан Рустамхановаз газетдин чинилай чухсагъул лугьун, адан тIварцIихъ алхишар агакьарун тIалабна.
Ингье абур:
Мирземегьамедов Абу: — мекьивал себеб яз садлагьана азарлу хьайи зун, Рамазан хьаначиртIани, лап кIевера гьатдай.
— Са азарханани герек туш. Вун за кIвале сагъарда, — лагьай духтурди вичин гаф кьилиз акъудна.
Вахт-вахтунда рапар яна, капельницаяр кутуна, дарманар гана, акваз-акваз дири хъхьана. Сагърай вич, чи патай гьуьрмет – хатур гзаф хьурай!
— Рамазанова Шериха: — 2019-йисан декабрдин варз. Кефсуз хьана, текьена къакъатна. Рамазанан къайгъударвили зун кIвачел акьалдар хъувуна.
— М.Къазимегьамедов: — 89 — йис яшар хьанвай зи тIалдиз чара авур Рамазаназ чухсагъул.
Ф.Рамазанова: — Зун кIвале, са больницадизни тефена, са куьруь вахтунда сагъар хъувур чи духтур Рамазаназ аферин.
Ихьтин алхишар мад ва мад гъиз жеда. “Тарифдиз лайихлу кас я”, — лугьузва вири цналвийри.
Са шумудра зун ФАП-дизни фена. Вичин буржи намуслудаказ кьилиз акъудзавай Рамазанан кабинетра авай къайда, михьивал акурла, тIазвайбурун гуьгьуьлар акваз-акваз ачух жеда.
— Йифиз, юкъуз халкьдин къуллугъда акъвазун зун патал чIехи бахт я, — лугьузва ада.
Къуй чи кьегьал хцихъ кIвалахда еке агалкьунар, хизанда хушбахтвал хьурай!
А.Рамазанов, зегьметдин ветеран,
Хив райондин Цналрин хуьр
