Республикадин кар алай “Зи Дагъустан — зи рекьер” проектдин сергьятра аваз 2020-йисуз 354 куьчеда ремонтдин кIвалахар тамамарда, хабар гузва РД-дин транспортдин ва рекьерин майишатдин министерстводи.
Малум хьайивал, 2020-йис ва пландик кутунвай 2021-2022-йисарин вахт патал Дагъустан Республикадин бюджет туькIуьрдайла муниципалитетрин рекьеринни шегьрейрин сеть ремонт авуниз 1 миллиардни 287 миллион манат субсидияр яз чара авун фикирда кьунва, абурукай 8 шегьердиз — 770,8 миллион манат ва 41 муниципальный райондиз 516,4 миллион манат рекье твадайвал я.
Алай йисуз, кар алай проектдин сергьятра аваз, санлай къачурла, 247 километрдин яргъивал ва 1488 агъзур кв.м. майдан авай 354 куьче ремонтдайвал я.
Гекъигун патал къейдна кIанда хьи, 2019-йисуз рекьер ремонт авуниз кар алай проектдин сергьятра аваз 771 миллион манат чара авунай. Ремонтдин кIвалахар алатай йисуз санлай къачурла 150,2 километрдин мензил ва 1 миллион кв.м. майдан авай 184 объектда тамамарнай.
Амина Муслимова
