Лезгийрикай маса миллетдин векилди хъсан  гафар лугьун, тариф авун рикIиз хуш жедай кар я. Гьаятда гьал­тай къунши Чакара зун акъвазарна.

— Нариман, аквазва,  кIвалахдал физ вак тади ква, са кьве декьикьа за вавай къакъудда.

— Вун патал пуд декьикьани гьайиф къведач, Чакар вах, — лагьа­на за. — Хабар яхъ.

— Хабар кьадай ахьтин месэла авач, заз вуна са касдикай газетдиз макъала кхьенайтIа, кIанзавай. Ам пара хъсан дишегьли я.

— Дишегьли?

— Хъсан дишегьли хьиз, ам тарифлу, регьимлу инсанни, кар чидай духтурни я. Ада и чи больница­да кIвалахзава. Зунни, захъ галаз­ па­латада хьайибурни адалай пара рази я.

— Гьахьтин хъсан духтур ятIа, кхьида ман, — хиве кьуна за.

Чакара заз адан тIвар, фамилия лагьана:  Эльмира  Жабраиловна Мегьамедова,  нефрологиядин отделенидин чIехи медсестра.

Чи арада хьайи и ихтилатдилай  гуьгъуьниз са шумуд гьафте алатна. Нубатдин сеферда Чакар гьалтайла ва ада рикIел хкайла, заз утан­миш хьана. Мад яргъал вегьенач ва зун Эльмира Жабраиловнадихъ галаз таниш хьана.

Каспийск шегьерда яшамиш жезвай хуьруьгви Гьажиев Жабраилан хизанда 1972-йисуз дидедиз хьайи рушал Эльмира тIвар эцигна. Шегьердин 2-нумрадин юкьван школа куьтягьай ам медицинадин училищедик экечIна. Хкянавай ­кеспи рикIи чIугунвай, гьавиляй руш гьар са тарсуниз мукьуфдивди ­гьазур жезвай. Училищедин къвалав гвай больницада тежрибадин тарсар тухудайлани, ада духтуррин, медсестрайрин меслятрихъ дикъет­дивди яб акалдай ва тапшурмишай кар гьабуру къалурзавайвал тикрардай. ИкI алахъзавай руша училище яру диплом къачуналди акьалтIарна. ЦIекIуьд йи­савай медсестра Дагрыбпромдин (алай вахтунда Махачкъала ше­гьердин клиникадин больница) больницадин азарлуяр кьабулдай отделенида кIвалахал жезва. Ина  Мегьамедовади 17 йисуз зегьмет чIугуна.

Заз чиз, больницадин и отделенидин кIвалах, маса отделенийрив гекъигайла, гьерекат, катун-калтугун, гьатта къалмакъал квайдини я. Шумуд сеферда жувазни акурвал: “тади куьмекди” гъизвай азарлуяр, ара-бир сад-садан  гуьгъуьналлаз, кьабулун, сифтегьан ахтармишунар, герек кхьинар авун, бязи вахтара гьа кушеткадал сифтегьан куьмек гун…

Бязи вахтара талукь отделенийра чкаярни жезвайди туш. Гьа ихьтин макъамда начагъдан мукьвабуру наразивални къалурзава, къални акъудзавайди я. Эльмиради гзаф сеферра  нервияр вини кIвачиз акъатнавай инсанар секинарун, дуьз гъавурда тун патал вичин сабурлувиликай, тежрибадикай менфят къачудай.

Рушахъ вичин мурадни авайди тир: кIелунар давамар хъувун, кьилин образование авай духтур хьун. Амма уьмуьрдихъ вичин кьетIен-вилер, истемишунар ава. Эльмира гъуьлуьз фена, хизанда аялар пайда хьана, институтдикай фикирдай вахтни амукьнач. Амма вичин кеспидай  Мегьамедовади  са шумуд сеферда чирвилер хкажна. Адаз кьилин категориядин пешекар — медсестра лагьай сер­тификат гана. Алакьунар авай, вичин везифайрив рикI гваз эгечI­завай хуьруьгви рушал больницадин кьилин духтурди мадни  ихтибарна: Мегьамедова цIийиз ачухнавай реконструктивный пластикадин хирургиядин, са шумуд йисалай колопроктологиядин отделенидин старший медсестравиле тайи­нарна.

Шегьердин больницадин да­раматдихъ цIийи корпус акал хъувуна, ина нефрологиядин цIийи отделение ачухна. ЧIехи медсес­травиле вуж эцигда? И месэладин гьа­къиндай  больницадин  чIехибур кIеве гьатнач. Чкадал вичин ве­зифайрив намуслувилелди, гъавурда аваз эгечIзавай, тешкиллувилин алакьунар авай, гьам медперсоналдихъ, гьам азарлуйрихъ галаз хуш рафтарвалдай, абурун гьа­къин­дай  датIана къайгъу чIуг­вадай пешекар алай — Эльмира Жабраиловна. ЧIехибур ягъалмишни хьанач. Къе нефрологиядин отделение больницада вири­далайни хъсанди, къайда, михьивал хуьзвайди, азарлуйриз вини дережада аваз къуллугъзавайди я. Отделение ихьтин дережадиз акъудуник чIехи медсестра Ме­гьамедовадин зегьметдин еке пайни ква.

Зун отделенидин палатайра къе­къвена, дуркIунрихъ, цварадин кIвалихъ галаз алакъалу азаррикай сагъар хъийизвай Пенкер, Муслимат (лезгияр), Разия, Айшат (аварвияр), Карина (лакви), Гьажимурад (даргиви), Кьасум (табасаранви) ксарихъ галаз рахана. Абуру ра­зивилин хейлин гафар лагьана, гьа са вахтунда вирида хушви­лелди кьуд месэла къейдна: духтурар, сестраяр, санитарар азарлуйрив къайгъударвилелди эге­чIун, рафтарвал,  герек дарманралди, рапаралди таъминарун, датIана къайдадал, михьивилерал амал авун ва тIям­лу, жуьреба-жуьре хуьрекар гун.

— Зун операция авурдалай ­гуь­­гъуьниз ина къатканва, сагъламвал мягькемарзава, — лагьана “Гьа­къи­къат” газетдин редакцияда  кIва­ла­хай Айшата. — Заз ина хьтин  ми­хьи­вал, азарлуйрив чпин мукьвабурув, танишрив хьиз эгечIзавай тегьер маса больницайра акунач. Эльмирадин регьимлувал, рафтарвал, чи гьакъиндай къайгъу чIугун иллаки тариф авуниз ла­йихлу я. Экуьнахъ атанмазди, ада вири палатайрал кьил чIугвада, йифиз ви­ри азарлуйриз герек дарманар ганани, рапар янани чирда, кIевел  алай азарлуйриз палатадиз вичи хуьрек гъида, медсестрайри начагъбуруз талукь вири ана­лизар аву­натIа, ахтармишда. Чи духтур Жа­миля Алиевнани гьахьтинди я. Вири больницайра гьа ихьтин духтурар, медсестраяр хьанайтIа, гьи­кьван хъсан тир!

— ЧIехи медсестра Эльмира Жабраиловна вичин къуллугъдиз кутугнавай дережада авай кас я, — къейдна аялрин бахчада кIва­лахзавай Муслимата. — Адан инсанвал, сабурлувал, начагъдан тIал, дерди вичел къачун, азаб кьези­ларун чешне къачудай ерияр я. От­де­ленида авай вирида адалай разивалзава.

Эльмира Мегьамедовадилай больницадин отделенидин кьиле авай ксарни, кIвалахдин юлдашарни рази я. Иллаки — колледжар куьтягьна къвезвай жегьил медсестраяр.

Эльмира Жабраиловна медсестрайрин Советдин член я. Ада талукь конференцийра иштиракзава, отделенидин къуллугъчийрихъ, начагъбурухъ галаз санитариядинни чирвилер гунин кIвалах тухузва. Жегьилриз вичин тежриба чирзава, датIана чирвилерни хкажзава.

— Заз жуван пеше кIанда, — къейд­зава Эльмира Жабраиловнади. — КIвалахал суварик хьиз физва лугьудай ихтилат ава. Зунни гьакI я. Начагъбур сагъ хъхьана, ра­зи яз хъфидайла, и важиблу кардик жуван зегьметдин пай хьунал зани шадвалзава. Хъсан нетижадал атуниз  больницадин админи­ст­рацияди тешкилнавай кIвалах­дин къулай шартIарини куьмекзава. Палатаяр герек вири мебел­далди, отделение медицинадин тадаракралди таъмин я. Раб-дармандикай дарвал авач. Мажиб вахт-вахтунда агакьзава. Коллектив сихди, кар алакьдайди, начагъбурун къуллугъда акъвазнавайди я. Ихьтин чкада зегьмет чIуг­вазни хуш жеда.

Нариман Ибрагьимов