И йикъара Дагъустандин Кьил Владимир Васильева республикада коронавирусдин тIегъуьндин вилик пад кьунин жи­гьетдай арадал гъанвай штабдин заседание кьиле тухвана. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, мярекатда гьукумдин органрин руководителри ва са жерге шегьерринни районрин кьилери иштиракна. Къейд ийин хьи, заседание интернетдикай менфят къачуналди, видеоалакъадин къайдада кьиле фена.

Алай вахтунда коронавирусдихъ галаз алакъалу яз республикада арадал атанвай гьаларикай Роспотребнадзордин РД-да авай Управленидин кьил Николай Павлова ихтилатна.

Адан гафарай малум хьайивал, республикада тIегъуьн акатзавайбурун кьадар гзаф жезва.

“Эгер чавай икьван чIавалди тIегъуьн акатнавай ксар виликамаз тайинариз, абур амай инсанривай яргъа ийиз, гуьзчивилик кутаз жезвайтIа, исятда и месэла авайдалай четин хьанва. Мисал яз, Ботлих районда тIегъуьн акатнавай са касдихъ галаз  алакъа хьанвай 79 инсан винел акъуднава. Пешекаррин чIалалди рахайтIа, коронавирус ­садакай масадак акатунин гьерекат 4-этапдив агакьна. Ида тIегъуьндин чешмеяр гьа­вада, чилел, улакьра, гзаф инсанар кIватI жезвай чкайра чкIанвайда­кай лу­гьузва ва нетижада ам акатунин игьтималвални артух хьанва. Маса гафаралди ла­гьайтIа, гила коронавирус неинки са тIе­гъуьн квайдахъ галаз алакъада хьайила, гьакIни туьквенра, аптекайра, жемиятдин улакьрани акатун мумкин я. Арадал атанвай гьалар фикирда кьуна, коронавирусдиз акси яз кьабулзавай серенжемар мадни векъи авуна кIанзава”, — лагьана Николай Павлова.

Владимир Васильев РД-дин Роспотребнадзордин кьили серенжемар ве­къи авунин жигьетдай гайи теклифдихъ галаз рази хьана. Кьилди къа­чуртIа, ада къейдна: “Идалай вилик тайинарай къайдайрал, гайи тек­лифрал, Муфтиятдин тIа­лабунрал гзафбуру амал тавурвиляй серенжемар генани векъи ийида. Тек са районда са инсан себеб яз 79 кас карантиндал эцигнава. Ихьтин дуьшуьшар шегьеррани арадал атун мумкин я. Николай Павлова лагьай гафарал вирида амална кIанзава. Аквар гьаларай, чавай чи халкь гзаф кьадар инсанар кIватI жезвай мярекатар хаталу тирдан гъавурда тваз хьанач. Белки, чахъ бес кьадар гафар, делилар, гьиссер хьанач жеди”, — лагьана Да­гъустандин Кьили.

Заседанидал республикада коронавирус чукIунин вилик пад кьунин жигьетдай кьабулнавай махсус планни веревирдна. Адан патахъай вичин фикир раиждайла, Владимир Васильева шегьерринни районрин кьилерихъ элкъвена икI лагьана:

“Эгер куь гуьзчивилик квай чкайра гьалар архайин ятIа, гьикI чаз — субъектрин кьи­­лериз — Урусатдин Президентди герек тир серенжемар кьабулдай ихтияр ган­ва­тIа, гьакI за квезни гьахьтин ихтияр гузва. Ам­ма инсанрин бедендин ифин ах­тар­мишунин кIвалах гуьзчивиликай хкудмир. Чи хиве исятда еке жаваб­дар­вал гьат­нава. Гьавиляй чун и месэладив вири къуватар эцигна эгечIна кIанзава. И жи­гьетдай­ гьар са руководителдиз къимет гудайвал я”.

РД-дин Роспотребнадзордин делилралди, 8-апрелдиз Дагъустанда коронавирус акатнавайбурун кьадар 43-дав агакьнава. Гьа са вахтунда духтуррилай тIе­гъуьн акатай 4 кас сагъар хъийиз алакьна. Санлай къачурла, республикада 3218 кас ахтармишнава, 3145 кас лагьайтIа, карантиндал ала.

РД-дин здравоохраненидин министерстводин пресс-къуллугъди хабар гузвайвал, тIегъуьн акатнавайбурукай 10 кас пис гьалда ава. Абур алай вахтунда реанимациядин отделенида датIана духтуррин гуьзчивилик ква.

Пешекарри къейдзавайвал, коронавирус масадак тIегъуьн квай касди уьгьуь, тирш ягъайла акатзава. Идалай гъейри, тIегъуьн квай кас хьанвай чкайра авай жуьреба-жуьре затIарин винелни коронавирусдин чешме хьун мумкин я. Гьавиляй­ мукьвал-мукьвал гъилер чуьхуьниз, дезинфекция авуниз кьетIен фикир гана кIан­зава. Гзаф инсанар кIватI жезвай чкайриз фидайла, мисал яз, туьквендиз, аптекадиз, жемиятдин улакьда акьахайла чинал маска, гъилерал бягьлеяр алукIунихъ еке метлеб ава.

РД-дин промышленностдин ва энергетикадин министрдин заместитель Батыр Эмеева хабар гайивал, и гьафтеда рес­пуб­ликадив 400 агъзур маска, агъзурдав агакьна тIегъуьн акат тавун патал алукI­за­вай  махсус  парталар,  дезинфекциядин тадаракар, халатар, бахилар агакьдайвал я.

РикIел хуьн, чавай гьар садавай коронавирусдин вилик пад кьаз жеда. Анжах духтурри къалурзавай меслятрал амал авуртIа.

Чи  мухбир