“Лезги газетдин” 100 йисан суварин къаршидиз физвай и йи-къа­ра газетдин виликан ва къенин редакторрихъ, журналистрихъ, мухбиррихъ галаз санал жуьреба-жуьре йисара адан амадагар, умудлу куьмекчияр хьайибурукайни кхьин, абур рикIел хкун лазим кар яз аквазва заз.

Лезги халкьдин уьтквем ва истеклу рухвайрикай сад Дербентдин консервиярдай комбинатдин директорвиле баркалладин таж алаз кIвалахай Сиражудин Шамсудинович Умаровни (вичиз Аллагьди вишра рагьметрай!) тир.

“Дербентдин цIийивилер” газетдин редакцияда отделдин зеведующийвиле, редактордин заместителвиле жуван пешедин рекьяй яхцIур йисав агакьна кIвалахай заз Сиражудин Шамсуди­нович мукьувай чидай, чи арада мягькем дуствални авай. Гзаф регьимлу, медени ва чарадан дердиникай хабар кьадай кас тир ам. Ингье и барадай жувазни талукь хьайи са мисал.

— Я Нариман, вун Дербентдиз цIийиз хтанвайбурукай  я, регъуь­валмир, лагь, гьихьтин дарвал, игьтияж ваз аватIа, — багъри­ касди хьиз, хабар кьуна  завай Сиражудин Шамсудиновича.

Жуван дерди-баладикай лагьайла, ада заз, Избербашдай хтана, Дербентда дегишарнавай кIвал ремонтдай материалрин куьмек ганай. Гуьгъуьнлай малум хьайивал, гзаф инсанри кIва­лахзавай карханада адалай са гьихьтин  ятIани себебдалди нарази хьайи кас авачир.

Сиражудин Умаров директор тир йисара Дербентдин консервиярдай комбинат уьлкведа лап хъсанбурун жергейра авай. Коллективдин агалкьунар са шумудра РСФСР-дин Верховный Советдин Президиумдин, Министррин Советдин ва ВЛКСМ-дин ЦК-дин пайдахриз, гьуьрметдин грамотайриз лайихлу хьана.

Продукциядин жуьреярни гегьеншарунихъ галаз санал комбинатди гьар йисуз 40 миллиондилайни гзаф банка консервияр гьасилзавай. Емишар чкайрал кьабулна гьялунин мураддалди С.Умарова Кьурагь  районда (КьепIирдал) ва Ахцегьа шире хкуддай цехар кардик кутунай. Вичин хайиди тир Штула аваданламишунин, ана цIийи мектеб эцигунин кIвалахра халисан къайгъу­дарвал, ватанпересвал къалурнай. Гила гьа мектебдал С.Ш.Ума­рован тIвар ала.

Эгер  Сиражудин Шамсудинович Умарован  зурба тешкилатчивилин ва регьбервал гунин вири терефрикай, агалкьунрикай тамамвилелди рахайтIа газетдин чин  бес жедач.

Гьавиляй зун адан патай “Лезги газетдиз” аваз хьайи чIехи гьуьрметдикай, майиллувиликай рахада.

Жуваз адет хьанвайвал, гьар йисуз газетарни журналар кхьидай вахт атайла, “Лезги газетдин” кьилин редактордин къул алай чарарни гваз зун шегьердин карханайриз, образованидин ва маса идарайриз, иллаки руководителар лезгияр тир чкайриз фидай. РикIел хъсандиз алама: и барадай жуван сифте гуьруьш, директор зи кIеви дустни тирвиляй, за консервиярдай комбинатдилай башламишнай.

— Ам гьихьтин лезги хьурай, жуван хайи газет кхьин тийидай? — хушвилелди кьабулнай зун Сиражудин Шамсудиновича ва гъил-гъилеваз зенгна, карханадин профкомдин председатель Наж­мудин Султановаз эверна, газет кхьинин патахъай тапшуругъ­ ганай. 200 газет кхьенай гьа йисуз консервиярдай комбинатда! Кар анал ала хьи, гуьгъуьнин йисарани, Сиражудин Шамсудино­вичан гуьзчивилик кваз, а карханада “Лезги газет” кхьиз­вай­бурун кьадар гзаф хьана. Шад жедай кар ам тир хьи, ада милли газет кхьи­нин барадай Дербентда вичин дустар тир маса лезги руководителризни — ири панелрикай кIвалер эцигдай комбинатдин­ директор Гьажи Жабраиловаз, ракьун рекьин станциядин начальник Гьажи Муталибоваз, гамар храдай фабрикадин директор Рамазан Рамазановаз ва масабурузни, зенгер авуна, меслят къалурдай. Нетижаярни хъсанбур жедай. А йисара Дербентда “Лезги газет” кхьизвайбурун кьадар 900-далайни виниз тир.

Лезги халкьдин баркаллу рухвайрикай сад хьайи Сиражудин Шамсудинович Умаров рагьметдиз фейила,  карханадин директорвилин къуллугъ  коллективди адан хва Салагьадин Умаровал ихтибарна. Гьадани бубадин кар давамарна — “Лезги газет” кхьинин кьадар тIимиларначир.

Ихтилат чи багъри “Лезги газетдикай”, ам кхьиникай, газетдин амадагрикайни тирвиляй заз генани лугьуз кIанзава: эхиримжи вахтара, масанрикай рахадач, гзаф лезгияр яшамиш жезвай (генани чеб артух хьурай!) Дербентда ва райондани чи милли­ газет кхьизвайбурун, кIелзавайбурун кьадар аквадайвал тIимил хьанва. Эсиллагь разивализ тежедай кар я. Суал къвезва: жуван милли газет, милли чIал чна хуьн тавуртIа, ни хуьда?

Са алава. Къадим Дербентда “Лезги газетдин” амадагар, адан лайихлувилерихъ рикI кузвай ксар гила ерли амач лагьайтIа, дуьз жезвач. Амазма. “Дагюгстрой” АО-дин гендиректор, Дагъус­тандин халкьдин Игит Гьажи Жабраилов, писатель, филологиядин илимрин кандидат Сардар Абил, Лезги театрдин директор Диана Эминова, налогрин инспекциядин  руководитель Жамбулат Гьасанов, сагъламвилин “Сабур” фирмадин директор Шамил Рамазанов гьа ихьтинбурукай я.

Генани тикрарзава: тIварар кьунвай ва маса амадагрилай чешне къачуна, дербентвияр тир вири лезгийри чи милли газет кхьин лазим я.

Нариман  Къарибов